გუშინ, 10 სექტემბერს ეფლის ყოველწლიური პრეზენტაცია გაიმართა, სადაც კომპანიამ თავისი ახალი პროდუქტი წარადგინა — აიფონის ახალ მოდელებთან ერთად კი ვიხილეთ Apple Watch-ის მეხუთე სერიის საათიც.

სწორედ გუშინ გაირკვა, რომ Apple Watch-ის რეკლამაში ეფლმა ჩცდ-ს ვიკა კალანდია გადაიღო. ვიკასთან ერთად კი ვიდეოში კიდევ ოთხი ქართველი მსახიობი ჩანს: დავით ბეკოშვილი, ბექა ქამხაძე, ირმა ლაპიაშვილი და კობა შონია.

მსახიობები ვიდეორგოლისთვის სარეკლამო კომპანია მეტრომ შეარჩია.

შეგახსენებთ, რომ პრეზენტაციაზე ჯამში აიფონის სამი ახალი მოდელი ვიხილეთ, iPhone 11, iPhone 11 Pro და iPhone 11 Pro Max.

ყველაზე იაფიანი მოდელის ფასი $699-დან დაიწყება, ხოლო iPhone 11 Pro $999, Pro Max კი $1 099 ეღირება. iPhone 11-ს მინის კორპუსი ექნება და ის ექვს ახალ ფერში იქნება ხელმისაწვდომი: იასამნისფერი, თეთრი, მწვანე, ყვითელი, შავი და Product Red.

რაც შეეხება საათს, ის ძალიან ჰგავს მეოთხე თაობის მოდელს, თუმცა, განახლებული ვერსია მანათობელი ეკრანით, SOS ზარით, რომელიც 150 ქვეყანაში ღილაკზე ხანგრძლივად დაჭერით შეგიძლიათ განახორციელოთ და 100%-ით ეკოლოგიურად სუფთა მასალითაა აღჭურვილი.

Apple Watch-ის მეხუთე სერიის ფასი 399 დოლარიდან დაიწყება და მის შეძენას, 20 სექტემბრიდან შეძლებთ.