ყოფილი პრეზიდენტი, მიხეილ სააკაშვილი თავდაცვის ყოფილ მინისტრს, ირაკლი ოქრუაშვილს მიმართავს და წერს, რომ მასთან რთული ურთიერთობის მიუხედავად უსამართლოდ მიიჩნევს მის პატიმრობას. ირაკლი ოქრუაშვილს 20 ივნისის აქციის საქმეზე აღკვეთი ღონისძიების სახით პატიმრობა აქვს შეფარდებული.

"არაუშავს, ირაკლი მალე შევხვდებით თბილისში თავისუფლად და ყველა ჩვენს უთანხმოებას გადავლახავთ", — წერს სააკაშვილი და ამით ირაკლი ოქრუაშვილის ფეისბუქ პოსტს ეხმაურება. ოქრუაშვილის განცხადებით, "გახარიას გაპრემიერებით ივანიშვილმა და რუსებმა პროცესების რადიკალიზაცია დაიწყეს".

ოქრუაშვილი 25 ივლისს დააკავეს. ის 20 ივნისის საქმესთან დაკავშირებით სისხლის სამართლის კოდექსის 225-ე მუხლის პირველი და მეორე ნაწილების საფუძველზეა დაკავებული. ეს მუხლები ჯგუფური ძალადობის ორგანიზებას, ხელმძღვანელობასა და მასში მონაწილეობას გულისხმობს. ამავე საქმეზე დაახლოებით 20-მდე ადამიანია ბრალდებული.

ირაკლი ოქრუაშვილი წლების განმავლობაში ნაციონალური მოძრაობის ხელისუფლებაში ყოფნის პირველ ნახევარში, სხვადასხვა დროს, იყო თავდაცვის, შინაგან საქმეთა და ეკონომიკის მინისტრი. მოგვიანებით, მან პარტია შექმნა და მაშინდელ ხელისუფლებას, თავის ძველ გუნდს დაუპირისპირდა.