შინაგან საქმეთა მინისტრობის კანდიდატი ვახტანგ გომელაური აცხადებს, რომ ჰესის მშენებლობის გამო დაპირისპირებისას პანკისში უფრო მეტ სპეცრაზმელს შეიყვანდა, ვიდრე მაშინდელმა მინისტრმა, გახარიამ შეიყვანა. ასე უპასუხა მან კითხვას იმაზე, გაითვალისწინა თუ არა გახარიამ სუს-ის რჩევა პანკისში განვითარებულ მოვლენებზე.

"მე შეიძლება უფრო მეტი შემეყვანა ახლანდელი გადმოსახედიდან. მე ეს განვაცხადე და არა ის, რომ რამე ვურჩიეთ და ამ ადამიანმა ან უწყებამ არ გაითვალისწინა. რა თქმა უნდა, შეცდომა იყო ის, რომ უფრო მეტი უნდა გვემუშავა ხალხთან. ეს სპეციფიკური ხეობაა", — განაცხადა გომელაურმა.

დაპირისპირება პანკისში

21 აპრილის დილას შინაგან საქმეთა სამინისტრომ პანკისის ხეობაში დიდი მასშტაბის საპოლიციო ძალა შეიყვანა, მათ შორის სპეციალური დანიშნულების რაზმი. მობილიზების მიზეზი ხეობაში დაგეგმილი ჰესის ხადორი 3-ის მშენებლობის განახლება იყო. როგორც შემდგომში გახდა ცნობილი პოლიციის შეყვანის მოთხოვნით შსს-ს ეკონომიკის სამინისტრომ მიმართა. უწყება ამბობდა, რომ მათ ობიექტის დაცვის გარანტია კომპანიამ მოთხოვა.

მოსახლეობამ არაფერი იცოდა და სამუშაოების განახლების შესახებ ხეობაში გამოჩენილი ტრაქტორით გაიგო. ამან პროტესტი გამოიწვია, რასაც პოლიციასთან დაპირისპირება მოჰყვა.

სპეცრაზმმა აქციის მონაწილეების წინააღმდეგ ცრემლსადენი გაზი და რეზინის ტყვიები გამოიყენა, რასაც პანკისელებმა ქვების სროლით და ტექნიკის დაზიანებით უპასუხეს.

დაპირისპირება რამდენიმე საათის განმავლობაში გაგრძელდა. შსს-ს განცხადებით, შედეგად დაშავდა 55 ადამიანი, მათ შორის 38 სამართალდამცავი.

პანკისელებთან მოსალაპარაკებლად გახარია ჩავიდა. მან ადგილობრივებს პირობა მისცა, რომ ჰესი იქამდე არ აშენდებოდა, სანამ 90% არ დაუჭერდა მხარს, მანამდე ჰესი არ აშენდებოდა. მინისტრმა მომხდარი "გარკვეულ ექსცესად" შეაფასა და აღნიშნა, რომ პანკისელებთან მოლაპარაკების რესურსი ამოწურული არ იყო და ემოციურ განცხადებების ნაცვლად მუშაობა იყო საჭირო.