იუსტიციის უმაღლესმა საბჭომ გიორგი მიქაუტაძე უზენაესი სასამართლოს კანდიდატად წარადგინა. მან 11 ხმა მიიღო.

გიორგი მიქაუტაძე ერთ-ერთი იყო იმ სიიდან, რომელიც იუსტიციის საბჭომ საქართველოს პარლამენტს რამდენიმე თვის წინაც წარუდგინა. მაშინ ამ სიის დასახელებას მოქალაქეების პროტესტი და პარლამენტის იურიდიულ საკითხთა კომიტეტის თავმჯდომარის, ეკა ბესელიას გადადგომა მოჰყვა. მაშინ უმრავლესობამ განმარტა, რომ კრიტერიუმების მიღებამდე უზენაესის წევრებს არ დაამტკიცებდნენ.

გიორგი მიქაუტაძე 2016-2017 წლებში თბილისის საქალაქო სასამართლოს თავმჯდომარე იყო. 2017 წლის აპრილში საქართველოს მოსამართლეთა კონფერენციამ ის საქართველოს იუსტიციის უმაღლესი საბჭოს წევრად აირჩია, ხოლო იმავე წლის ივნისში საქართველოს იუსტიციის უმაღლესი საბჭოს მდივნად.

იუსტიციის უმაღლესი საბჭოს ყოფილმა თავმჯდომარემ ნინო გვენეტაძემ, რომელმაც 2018 წლის 2 აგვისტოს თანამდებობა დატოვა, გიორგი მიქაუტაძე და საბჭოს რამდენიმე წევრი ზეწოლასა და შანტაჟში დაადანაშაულა.