საქართველოს პარლამენტში მთავრობის ახალი შემადგენლობისთვის ნდობის გამოცხადების პროცედურა გახარიას პრემიერად წარდგენიდან ერთ საათში დაიწყო.

საქართველოს პარლამენტის თავმჯდომარემ, არჩილ თალაკვაძემ ბიუროს წევრებს გააცნო განცხადება ახალი სამთავრობო პროგრამისა და შემადგენლობის შესახებ. ხვალიდან, 4 სექტემბრიდან მთავრობის ახალ შემადგენლობას თემატურ კომიტეტზე მოუსმენენ.

მთავრობის ახალ შემადგენლობას საკომიტეტო მოსმენების შემდეგ კენჭს კვირა დღეს დანიშნულ პლენარულ სხდომაზე უყრიან.

მინისტრი, რომლის გადადგომასაც საზოგადოების ნაწილი 76 დღეა ითხოვს, მმართველმა პარტიამ დააწინაურა და პრემიერ-მინისტრობის კანდიდატად წარადგინა. ივანიშვილის თქმით, კანდიდატურა თავად წარადგინა და მან სრული მხარდაჭერა მიიღო.

რამდენიმე თვის წინ შინაგან საქმეთა მინისტრი გახარია ამტკიცებდა, რომ პრემიერობა არ სურს. ასევე, ამბობდა, რომ 20 ივნისის საქმის გამოძიებას ბოლომდე მიიყვანდა, ამიტომ გადადგომას არ აპირებდა, თუმცა დღეიდან შინაგან საქმეთა მინისტრი აღარ არის.

გიორგი გახარიას ხმაურიანი შს მინისტრობა

მას შემდეგ, რაც პოლიციამ 20 ივნისს ანტისაოკუპაციო აქცია დაშალა, რა დროსაც ათეულობით ადამიანი დაშავდა და ორმა თვალი დაკარგა, მისი გადადგომის მოთხოვნით აქცია #სირცხვილია დაიწყო. გახარია ამბობდა, რომ დაშლის ბრძანება თვითონ გასცა და ასევე ამტკიცებდა, რომ აქციის მონაწილეები ინფორმირებულები იყვნენ, როცა დაშლა დაიწყო. მისი თქმით, პოლიციას არ გამოუყენებია არც ერთი ტყვია, რომელიც კანონით აკრძალულია. გახარია ამბობდა იმასაც, რომ ყველაფერი, რაც აქციის ღამეს მოხდა მისი პასუხისმგებლობაა.

გახარიას მინისტრობას უკავშირდება არაერთი გახმაურებული საქმე. მათ შორის ხორავას ქუჩაზე მომხდარი მკვლელობის გამოძიებაც, როცა მინისტრი მეოთხე დღესვე ამტკიცებდა, რომ ყველა დამნაშავე დაკავებულია, გამოძიება კი ამ დრომდე გრძელდება და ერთ-ერთი ბრალდებული ერთი წლის შემდეგ დააკავეს. მის სახელს უკავშირდება ბასიანსა და გალერიში ჩატარებული სპეცოპერაცია და საპროტესტო აქციები, რომელიც მინისტრმა "ბოდიშით" დაასრულა. მისი მინისტრობის დროს არ მიეცა LGBTQI თემს უსაფრთხოების გარანტიები საპროტესტო აქციების გასამართად და პრაიდის ჩასატარებლად. მისივე ბრძანებით ჩატარდა სპეცოპერაციაც პანკისში, რომელიც მოსახლეობასთან დაპირისპირებაში გადაიზარდა.

სხვადასხვა საქმეზე მას შანტაჟსა და მუქარაშიც ადანაშაულებდნენ, რასაც ის უარყოფდა. მათ შორის თიბისი ბანკის. თიბისის დამფუძნებელი, მამუკა ხაზარაძე აცხადებდა, რომ მინისტრისგან წინასაარჩევნო პერიოდში მუქარის წერილი მიიღო. შანტაჟზე საუბრობს ზუგდიდის სკოლის დირექტორის, ია კერზაიას ოჯახიც, რომელიც, ასევე, გახარიას პასუხისმგებლობას ხედავს.

პროფესიული გამოცდილება

გიორგი გახარიას არის ბიზნესის მართვის და პოლიტიკურ მეცნიერებათა მაგისტრი. 1994-2000 წლებში ის სწავლობდა ლომონოსოვის სახელობის მოსკოვის სახელმწიფო უნივერსიტეტში პოლიტოლოგიის ფაკულტეტზე, პოლიტიკურ მეცნიერებების განხრით. 2002-2004 წლებში კი სწავლობდა ისევ ლომონოსოვის სახელობის მოსკოვის სახელმწიფო უნივერსიტეტის უმაღლეს ბიზნეს სკოლაში ბიზნესის მართვის სპეციალიზაციით.

  • 2019 წლის აპრილიდან დღემდე — ეროვნული უსაფრთხოების საბჭოს მდივანი;
  • 2017 წლის 13 ნოემბრიდან დღემდე — საქართველოს ვიცე-პრემიერი, შინაგან საქმეთა მინისტრი;
  • 2016 წლის 27 ნოემბერი - 2017 წლის 13 ნოემბერი — საქართველოს ეკონომიკისა და მდგრადი განვითარების მინისტრი;
  • 2014 წლის დეკემბერი - 2016 წლის სექტემბერი — ეკონომიკური საბჭოს მდივანი;
  • 2013 წლის მარტი - 2016 წლის ივლისი — საქართველოს ბიზნესომბუდსმენი;
  • 2008 წლის ნოემბერი - 2013 წლის თებერვალი — Lufthansa Service Holding AG. LSG, Frankfurt am Main, Germany GR & ბიზნესის განვითარების დირექტორი აღმოსავლეთ ევროპაში, დსთ-ს ქვეყნებსა და რუსეთის ფედერაციაში;
  • 2006 წლის სექტემბერი - 2009 წლის მაისი — მოსკოვის სახელმწიფო უნივერსიტეტის გამოყენებითი ბიოტექნოლოგიის მოწვეული ლექტორი;
  • 2004 წლის მაისი - 2008 წლის ნოემბერი — SFK Group - გენერალური დირექტორი

პროცედურები დასანიშნად

პროცედურულად, ქართულმა ოცნებამ გახარიას კანდიდატურა პრეზიდენტს, სალომე ზურაბიშვილს უნდა წარუდგინოს დასამტკიცებლად, რომელსაც იგი უკვე პარლამენტს გადაუგზავნის განსახილველად. შვიდდღიან ვადაში პრემიერ-მინისტრობის კანდიდატმა უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან, ასევე, უნდა წარადგინოს სამთავრობო პროგრამაც. ამის შემდეგ კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა დაკომპლექტდეს.

გაიგეთ მეტი: