შვეიცარიის იუსტიციისა და პოლიციის დეპარტამენტის ინფორმაციით, ფედერალურმა საბჭომ უსაფრთხო ქვეყნების სიაში საქართველო დაამატა. ცვლილება პირველი ოქტომბრიდან ამოქმედდება. ამის შესახებ ადგილობრივი გაზეთი წერს. ინფორმაცია On.ge-ს საგარეო საქმეთა სამინისტროში დაუდასტურეს.

ეს გადაწყვეტილება შვეიცარიამ თავშესაფრის მაძიებელთა რიცხვის შემცირების მიზნით მიიღო.

"ამ გადაწყვეტილებით ფედერალური საბჭო აგზავნის მკაფიო სიგნალს იმის შესახებ, რომ შვეიცარია იღებს ყველა საჭირო ზომას, რომ მინიმუმამდე დაიყვანოს თავშესაფრის უსაფუძვლო განაცხადების რაოდენობა", — წერია განცხადებაში.

2017 წელს უვიზო მიმოსვლის ამოქმედების შემდეგ საქართველოდან შვეიცარიაში თავშესაფრის მაძიებელთა რიცხვი გაიზარდა. სტატისტიკის მიხედვით, 2017-2018 წლებში შვეიცარიაში თავშესაფარი საქართველოდან უფრო ბევრმა მოითხოვა, ვიდრე ერაყიდან, სომალიდან, ალჟირიდან, შრი ლანკიდან და ნიგერიიდან.

შვეიცარია ევროპის მე-15 ქვეყანაა, რომელმაც საქართველო უსაფრთხო ქვეყნების სიაში შეიყვანა. საქართველო უსაფრთხო წარმოშობის ქვეყნების სიაში შეყვანილი ჰყავს: ბულგარეთს, საფრანგეთს, ლიხტენშტაინს, ავსტრიას, ბელგიას, ნიდერლანდებს, ისლანდიას, ლუქსემბურგს, ირლანდიას, ესტონეთს, დანიას, ჩეხეთს, სლოვენიასა და კვიპროსს.