ბორის ჯონსონი დიდი ბრიტანეთის პრემიერ-მინისტრის რანგში ევროპაში პირველი ვიზიტით იყო. ის გერმანიისა და საფრანგეთის ლიდერებს შეხვდა და ბრექსიტის საკითხს განიხილავდა.

საფრანგეთში ვიზიტისას ჯონსონის მოლაპარაკებები პრეზიდენტ ემანუელ მაკრონთან არაფორმალურ გარემოში გაიმართა. გავრცელდა ფოტო, სადაც ბორის ჯონსონს ელისეის სასახლის მაგიდაზე ფეხი უდევს. ამის გამო სოციალურ ქსელებში დიდი ბრიტანეთის პრემიერ-მინისტრს "თავხედი და უცოდინარი" უწოდეს.

თუმცა, როგორც აღმოჩნდა, ყველაფერი უფრო მარტივადაა. Sky News-ის კორესპონდენტის, ტომ რაინერის თქმით, ჯონსონმა მაგიდაზე ფეხი მაკრონის ხუმრობის საპასუხოდ დადო.

როგორც კორესპონდენტი ყვება, მაკრონმა შესთავაზა ჯონსონს, რომ თუ მას სურს თავი იგრძნოს როგორც საკუთარ სახლში, შეუძლია, მაგიდაზე ფეხი შემოდოს. ჯონსონიც ასე მოიქცა. საფრანგეთის პრეზიდენტმა კი პრემიერ-მინისტრის ხუმრობას ღიმილით უპასუხა.