შერიგებისა და სამოქალაქო თანასწორობის საკითხებში საქართველოს სახელმწიფო მინისტრი ქეთევან ციხელაშვილი ფიქრობს, რომ წინასაარჩევნოდ ოკუპირებულ ტერიტორიებზე გამშვები პუნქტების ჩაკეტვა, ჩვეული პრაქტიკაა. მისი თქმით, ერგნეთში ინციდენტების პრევენციისა და მათზე რეაგირების მექანიზმის უკანასკნელი შეხვედრის ფარგლებში ქართულმა მხარემ მოითხოვა არ ყოფილიყო შეზღუდული გადაადგილება:

"სამწუხაროდ ეს არ არის პირველი შემთხვევა 2008 წლის შემდგომ ყველა არჩევნების დროს და ყველა მნიშვნელოვანი პოლიტიკური მოვლენის დროს ხდება აი ამ გამშვები პუნქტის ჩაკეტვა და სამწუხაროდ შეზღუდვა ისედაც შეზღუდული გადაადგილების თავისუფლების ჩვენი მოსახლეობის, ცალსახად ამას ერთი შეფასება აქვს, რომ ეს არის არალეგიტიმური რაც ხდება საქართველოს ტერიტორიაზე. მაგრამ კიდევ ერთხელ ვამბობ ეს გახლავთ ის სამწუხარო პრაქტიკა, რომელიც საქართველოს ტერიტორიების განგრძობად ოკუპაციას უკავშირდება".

ოკუპირებული სამხრეთ ოსეთის თავდაცვის კომიტეტის გადაწყვეტილებით, 8 ოქტომბერს საქართველოს პარლამენტის არჩევნებთან დაკავშირებით, საზღვარი ერთი დღით დაიკეტება. აღნიშნული საზღვარი 7 ოქტომბერს, საღამოს 8 საათზე დაიკეტება და 9 ოქტომბერს, დილის 7 საათზე გაიხსნება.