მოგბეზრდათ სწრაფი მოდა? თქვენს გარდერობში არსებული ტანსაცმლის გაცვლით, გაზიარებით და გადაკეთებით რევოლუციის მოხდენა შეგიძლიათ.

სწრაფი მოდა, შესაძლოა, იაფი და ტრენდული იყოს, მაგრამ ის დაბალშემოსავლიანი სტუდენტებისთვის ხელსაყრელი არაა.

მოდის რევოლუციის წყალობით, დღეს ამ ინდუსტრიის შესახებ უფრო მეტი ინფორმაცია გვაქვს, ვიდრე ოდესმე. ჩვენ ვიცით, რომ ტანსაცმლის მწარმოებელი ქარხნები მდინარეებს მომწამლავი ქიმიური ნივთიერებებით აბინძურებენ, ფერმერები დიდი რაოდენობით ბამბის მოსავლის მოსაყვანად ჯანმრთელობისთვის საფრთხის შემცველ პესტიციდებს იყენებენ და მხოლოდ ერთი მაისურის დასამზადებლად ათასობით ლიტრი წყალი იხარჯება.

"ამ ინდუსტრიის საიდუმლოებები დღეს მარტივად მჟღავნდება და მათი უგულებელყოფა ძალიან რთულია", — ამბობს დე მონტფორტ უნივერსიტეტის მოდის კომუნიკაციის და სტილის პროგრამის ხელმძღვანელი ჯესიკა დონელი.

სწრაფი მოდა უარყოფით გავლენას არამხოლოდ ხალხზე და გარემოზე ახდენს, არამედ ის თქვენს საბანკო ბალანსსაც ამცირებს. ჩვენი საყვარელი ბრენდები უფრო მეტი და მეტი ტანსაცმლის შეძენისკენ გვიბიძგებენ. დღეს 60%-ით მეტ ტანსაცმელს ვყიდულობთ და მათ უფრო ნაკლები დროის განმავლობაში ვიყენებთ ვიდრე თხუთმეტი წლის წინ.

ახალი ტანსაცმლის სასწრაფოდ შეძენის ნაცვლად, ხომ არ ჯობს, ცოტა უფრო კრეატიულები ვიყოთ და ძველი ნივთებისგან შესანიშნავი რაღაცეები შევქმნათ?

ცენტრალ სეინტ მარტინის ხელოვნების აკადემიის ხელოვნების ფაკულტეტის მესამე კურსის სტუდენტი, 24 წლის მელანი ლიმანი ამბობს:

"მე 18 თვის წინ ვებსაიტ Depop-ზე დავიწყე იმ ტანსაცმლის გაყიდვა, რომელთაც უკვე აღარ ვიცვამდი და დაახლოებით ნახევარი წლის შემდეგ, ეს ჩემთვის ერთგვარი ბიზნესი გახდა. ეს საქმე სამოსის საქველმოქმედო მაღაზიებში და ბაზრობებზე ძიებით დავიწყე. ამას გარდა, წელიწადში რამდენჯერმე, ტაილანდში, ჩემს სახლში მივემგზავრები, სადაც ვინტაჟური ტანსაცმლის საკმაოდ იაფად შეძენაა შესაძლებელი. სადაც არ უნდა წავიდე, ვცდილობ, რომ საქველმოქმედო მაღაზიებსა და სხვადასხვა ბაზრობებს აუცილებლად ვესტუმრო. მხოლოდ Depop-ზე ორი კარადა ტანსაცმელი გავყიდე.

სურათების გადაღებისას უმჯობესია, რომ გასაყიდი სამოსი ვინმეს ჩააცვა — ასე უფრო მეტი შანსია, რომ ხალხი მათ შეიძენს. დიდი დროც არ მიაქვს — ყველა იმ ტანსაცმელში სურათის გადასაღებად, რაც მარაგში მაქვს, ერთი ან ორი საათი მჭირდება. ფოტოებს ინტერნეტში მაშინვე არ ვტვირთავ. ტანსაცმლის გასაყიდად კარგია კვირა დღე, ასევე მათ დიდ რაოდენობას ხელფასის დღისთვის ვიტოვებ, რადგან ვიცი, რომ მაშინვე უამრავი მყიდველი გამოჩნდება.

ნივთების გაყიდვას თქვენც გირჩევთ, განსაკუთრებით, სტუდენტობის პერიოდში, რადგან ასე გარემოს გადარჩენას და ფულის გამომუშავებასაც შეძლებთ. ვერც კი წარმოვიდგენდი, რომ ეს საქმე ჩემთვის ბიზნესი გახდებოდა, მაგრამ ყველაფერი მცდელობით მოდის. თავიდან ჯიბის ფულს ვშოულობდი, ახლა მიღებული შემოსავალით ბინის ქირასაც კი ვიხდი".

რჩევები:

• გინდათ თქვენი ძველი ჯინსები განაახლოთ? მისი ბოლოები მაკრატლით გადაჭერით, შემდეგ გარეცხეთ და ახალი შარვალიც მზადაა;
• ნაქსოვი ტანსაცმლის ძველი იერის დასაბრუნებლად მას ბლაგვი სამართებელი ნაზად გადაუსვით;
• ქვედაბოლოს ფოჩები გაუკეთეთ, ვინტაჟურ ჯინსის ქურთუკს ფიგურული ქსოვილი მიაკერეთ, ჩუსტებს სეკინები მიაწებეთ ან ძველ მაისურზე სასურველი სლოგანი ამოქარგეთ;
• ტანსაცმლის შეღებვა მათ მთლიანად განსაახლებლად შესანიშნავი იდეაა. ისინი ერთ ფერში ან ტრენდული Tie-dye-ის სტილის სამოსის შესაქმენლად რეზინების გამოყენებით სხვადასხვა ფერებში შეღებეთ;
• ტანსაცმლის ხვრელების ფერადი ძაფებით ამოკერვით თუ ჯინსებზე გასაფორმებელი ქსოვილის მიკერებით თქვენი სამოსი ყველასგან განსხავებული გახადეთ.