შინაგან საქმეთა სამინისტრომ განსაკუთრებით დიდი ოდენობით ნარკოტიკული საშუალებების შეძენა-შენახვისა და გადაზიდვის ბრალდებით ერთი პირი რუსთავში დააკავა.

შსს-ს განცხადებაში ნათქვამია, რომ პოლიციამ დაკავებული გადამოწმების მიზნით მანქანით გადაადგილების დროს გააჩერა. უწყების თქმით, ბრალდებულმა გადამოწმების პროცესში მანქანა მიატოვა და გაქცევა სცადა.

შსს-ს მტკიცებით, მათ ნივთმტკიცებად ამოიღეს 709 აბი MDMA, 86 აბი სუბოქსინი, 93 აბი სუბუტექსი, 3 აბი B8, 119 შეკვრად დაფასოებული 1 კილოგრამი და 239 გრამი ე.წ. ბიო, ასევე, 28,890 გრამი ახალი ფსიქოაქტიური ნივთიერება.

გამოძიება საქართველოს სისხლის სამართლის კოდექსის 260-ე მუხლის მე-2 ნაწილით და მე-6 ნაწილის ა ქვეპუნქტით მიმდინარეობს. დანაშაული 8-დან 20 წლამდე ან უვადო პატიმრობას ითვალისწინებს.