ლეიბორისტული პარტიის ლიდერი შალვა ნათელაშვილი პარლამენტს ქართველი ერის ისტორიული გენოციდის შესახებ დადგენილების პროექტის შემუშავებას სთხოვს. ამის შესახებ ნათელაშვილმა ბრიფინგი გამართა და პროექტის მოტივად საქართველოს შესახებ რუსეთის პრეზიდენტის ვლადიმერ პუტინის დეზინფორმაციები დაასახელა.

"რამდენიმე დღის წინ პუტინმა საქართველოს შესახებ მთელ მსოფლიოს ცრუ ისტორია მოუყვა, რომლის თანახმადაც, ჩვენ პატარა ერების გენოციდისა და ოკუპირების მეტი არაფერი გაგვიკეთებია. ეს იყო ახალი გეგმა საქართველოს შემდგომი დაშლისკენ და შედეგებმაც არ დააყოვნა. უახლოეს დღეებში რუსეთის სახელმწიფო სათათბირო ე.წ. დუმა იწყებს დადგენილების პროექტის განხილვას, თითქოს ოსებს მოვუწყვეთ გენოციდი. მოვუწოდებ საქართველოს პარლამენტს, ყოველგვარი ოპოზიცია პოზიციის გარეშე, სასწრაფოდ მოიწვიეთ საგანგებო სხდომა და მიიღეთ დადგენილების პროექტი – ქართველი ერის მიმდინარე და ისტორიული გენოციდის შესახებ. მხოლოდ დასწრება იდეოლოგიურ ომში არის გარანტია მომავალი გამარჯვებებისა და ჩვენი მთლიანობის", — განაცხადა შალვა ნათელაშვილმა.

მცოცავი ბორდერიზაციისა და ანტისაოკუპაციო აქციების პარალელურად, ოკუპანტი ქვეყნის პრეზიდენტი ვლადიმერ პუტინი ამტკიცებს, რომ ოკუპანტი არა თავად, არამედ საქართველოა. ის ოკუპაციის საკუთარ ვერსიას ავრცელებს და ირწმუნება, რომ 1918 წელს საქართველომ გერმანიის დახმარებით აფხაზეთის ოკუპაცია მოახდინა. ის კიდევ უფრო შორსაც წავიდა და ოსების გენოციდში საქართველო დაადანაშაულა.

რუსეთის დუმა აპირებს, რომ 1920 წელს საქართველოს მიერ "სამხრეთ ოსების გენოციდი" განიხილოს. როგორც დუმის თავმჯდომარემ, ვიაჩესლავ ვოლოდინმა თქვა, საკითხის განხილვა უახლოეს სხდომაზე მოხდება.