საქართველოს პრემიერის, მამუკა ბახტაძის თქმით, 600 ევრო რუსეთიდან ფრენების დასაფინანსებლად იმ მიზეზით გამოიყო, რომ რუსეთში მყოფ საქართველოს მოქალაქეებს საქართველოში დაესვენათ.

"ყველაზე ნაკლები იყო ტურისტული კომპონენტი. ეს არის გადაწყვეტილება, რომელიც უკავშირდება ჩვენს ვალდებულებას და პასუხისმგებლობას", — განმარტა პრემიერმა და დასძინა, რომ რუსეთში მყოფ საქართველოს მოქალაქეების დიდ ნაწილს დასვენება საქართველოში დაგეგმილი ჰქონდა უკვე.

რამდენიმე დღის წინ ცნობილი გახდა, რომ საქართველოს მთავრობა რუსეთიდან სატრანზიტო ფრენებს დაასუბსიდირებს. ამისთვის მთავრობამ 600 ათასამდე ევრო გამოყო. შესაბამის დოკუმენტს ხელი პრემიერ-მინისტრმა, მამუკა ბახტაძემ მოაწერა. დადგენილება ძალაში 24 ივლისს შევიდა.

დოკუმენტის თანახმად, მთავრობა რუსეთიდან ერევნის გავლით თბილისისა და ბათუმის მიმართულებით, და პირიქით, ბილეთებს მგზავრზე მაქსიმუმ 90 ევროთი დააფინანსებს.

ამავე დოკუმენტის მიხედვით, ავიაკომპანიამ უნდა უზრუნველყოს წლის განმავლობაში ფრენების უწყვეტად, კვირაში, სულ მცირე, ორი სიხშირით შესრულება თითოეულ პრიორიტეტულ სატრანზიტო მიმართულებაზე.

დოკუმენტის თანახმად, ხელშეკრულება გაფორმდება იმ ავიაკომპანიასთან, რომელიც პირველი მიმართავს აეროპორტების გაერთიანებას. ამ დროისთვის, რუსეთიდან ერევნის გავლით სატრანზიტო ფრენებს მხოლოდ ჯორჯიან ეარვეისი ასრულებს.

რუსეთის პრეზიდენტმა, ვლადიმერ პუტინმა რუსულ ავიაკომპანიებს საქართველოში ფრენები აუკრძალა, ხოლო, რუსეთის ტრანსპორტის სამინისტროს გადაწყვეტილებით, საქართველოს ავიაკომპანიებს რუსეთში ფრენები ეკრძალება. ორივე შეზღუდვა 8 ივლისიდან ამოქმედდა.