სამტრედიაში რამდენიმე კაცმა, მათ შორის სასულიერო პირმა ქალსა და მის უცხოელ ქმარს სიტყვიერი და ფიზიკური შეურაცხყოფა მიაყენა. ამის შესახებ ინფორმაციას ადგილობრივი იმედა გოგავა Facebook-ზე ავრცელებს.

"ქალაქის მთავარ მაგისტრალზე ქართველი "ვაჟკაცები" დაუნდობლად გაუსწორდნენ ჩემს მეგობარ ახალგაზრდა გოგოს და მის უცხოელ მეუღლეს, რომლებსაც მიაყენეს ფიზიკური და სიტყვიერი შეურაცხყოფა (რომელიც გაჟღენთლი იყო დისკრიმინაციული და ჰომოფობიური გამოხტომებით). საგანგაშოა ისიც, რომ ამ ისტორიაში ფიგურირებს მღვდელიც", — წერს ადგილობრივი.

შინაგან საქმეთა სამინისტროში On.ge-ს უთხრეს, რომ მომხდარზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს. მათივე ცნობით, მიმდინარეობს საგამოძიებო მოქმედებები და დაინიშნება ექსპერტიზა. მომხდარზე, ჯერჯერობით, არავინ დაუკავებიათ.