იუსტიციის ყოფილი მინისტრი, ზურაბ ადეიშვილი ამბობს, რომ წინა ხელისუფლებამ ბიზნესმენ ბიძინა ივანიშვილს მილიარდი დოლარის გადასახადი აპატია. როგორც მან რუსთავი 2-ის ყოფილ გენერალურ დირექტორთან, ნიკა გვარამიასთან ინტერვიუს დროს თქვა, ივანიშვილი გადასახადებს 2009 წლამდე არ იხდიდა.

გვარამიამ ჰკითხა, მილიარდის ოდენობის გადასახადის პატიების სანაცვლოდ რა მიიღო ხელისუფლება, რაზეც ადეიშვილმა უპასუხა:

"ფულის გარკვეულ ნაწილს ნებაყოფლობით მართლა ხარჯავდა, არავინ აძალებდა... ჩემი აზრით, ეს უნდა იყოს ყოველწლიურად 50 მილიონი დოლარი, სამი-ოთხი წლის განმავლობაში, მეტი არა".

მისივე თქმით, 2003-2007 წლებში ბიძინა ივანიშვილის ქონება ძალიან გაიზრდა, ხოლო წლების განმავლობაში ხელისუფლების დამოკიდებულება ბიძინა ივანიშვილის მიმართ შეიცვალა:

"დრომაც აჩვენა, რომ ჩვენი დამოკიდებულება იყო აბსოლუტურად ნაივური და არასწორი, პრინციპში, არასახელმწიფოებრივიც".

ზურაბ ადეიშვილს ე.წ. ცხრაწლიანი რეჟიმის ერთ-ერთ მთავარ პირად განიხილავენ. წინა ხელისუფლების დროს ის სხვადასხვა დროს იყო გენერალური პროკურორი და იუსტიციის მინისტრი. 2017 წელს ზურაბ ადეიშვილი ვანო მერაბიშვილთან ერთად აკურას ღვინის ქარხნის ჩამორთმევის საქმეზე დამნაშავედ სცნეს და 2 წლით თავისუფლების აღკვეთა მიესაჯა. ამნისტიის შესახებ საქართველოს კანონის გამოყენებით საბოლოოდ განესაზღვრა 1 წლით და 6 თვის ვადით თავისუფლების აღკვეთა.

ამავე თემაზე: