ბავშვების უმრავლესობა სკოლაში ტრანსპორტის დახმარებით მიდის, თანაც ისე, რომ გზაში არავითარი დაბრკოლების ან დისკომფორტის გადატანა არ უწევს. თუმცა, ამ ყველაფრის პარალელურად მსოფლიოს სხვადასხვა კუთხეში, ამჯერად კი კონკრეტულად ვიეტნამში, პარალელური და საკმაოდ სევდიანი რეალობა არსებობს.

საქმე ის არის, რომ დიენბენელ მოსწავლეებს სკოლაში მისასვლელად მდინარის არც მეტი, არც ნაკლები, ცელოფნის პარკით გადაცურვა უწევთ და ეს ხდება ყოველთვის, როცა იქ წვიმების სეზონი იწყება და წყალი დიდდება.

ბავშვებს ეს სახიფათო გზა ძალიან აშინებთ, თუმცა, მოტივირებულები არიან, რომ რადაც არ უნდა დაუჯდეთ, სკოლა არ გააცდინონ და განათლება მიიღონ.

ადიდებული მდინარის ცელოფნის პარკით გადაცურვა უსაფრთხო არ არის და პატარა შეცდომაც კი სავალალო შედეგით შეიძლება დასრულდეს.

"ამ პერიოდში მდინარის გადაცურვა საკმაოდ სახიფათოა. ჩემი ნათესავები ბავშვების მეორე ნაპირზე გადასაყვანად ტივს იყენებენ ხოლმე, თუმცა, ახლა მისი გამოყენება შეუძლებელია", — ამბობს სოფლის ერთ-ერთი მცხოვრები.

სოფელში იმედს გამოთქვამენ, რომ ადგილობრივი ხელისუფლება მათ პრობლემას მალე გადაჭრის და მდინარეზე გადასასვლელ ხიდს გააკეთებს.