რუსეთის ქალაქ ტორჟოკში პატრიარქ კირილეს ვიზიტისთვის სამანქანო ხიდზე ასფალტი დააგეს. თუმცა პატრიარქის გამგზავრების შემდეგ ასფალტი მალევე აყარეს.

გამოცემა Meduza-ს ინფორმაციით, სანამ პატრიარქი ჩავიდოდა ადგილობრივმა მთავრობამ ქალაქის მოწესრიგება დაიწყო: მოგავეს ტროტუარები, მოთიბეს ბალახი და მდინარე ტვერცას გადასასვლელ ხიდზე ასფალტის თხელი ფენა დააგეს.

21 ივლისს პატრიარქმა კირილემ ადგილობრივ მონასტერში ღვთისმსახურება აღავლინა. ლიტურგიის შემდეგ კი მას ქალაქი, ეკლესიები და ტაძრები დაათვალიერებინეს.

კირილეს გამგზავრების შემდეგ, 26 ივლისს მდინარის გადასასვლელ ხიდზე დაგეგმილი სარემონტო სამუშაოები დაიწყო. კირილეს ვიზიტამდე გაკეთებული ასფალტი აყარეს. ქალაქის მთავრობამ განმარტა, რომ კირილეს ვიზიტისთვის დროებითი ასფალტი დაიგო, ხოლო დაგეგმილი სარემონტო სამუშაოები ოქტომბრამდე გაგრძელდება.

ფოტო: Подслушано в Торжке / Vkontakte

"ყურადღება! ხიდზე დაგებულია დროებითი ტექნოლოგიური საფარი. მოძრაობის დროს დაიცავით სიფრთხილე".

ფოტო: Подслушано в Торжке / Vkontakte