რუსი ოპოზიციონერი ალექსეი ნავალნი საავადმყოფოდან გაწერეს და საპატიმროში დააბრუნეს. ამის შესახებ ინფორმაცია ნავალნის მკურნალმა ექიმმა, ანასტასია ვასილიევამ გაავრცელა.

როგორც ვასილიევამ ფეისბუქზე დაწერა, რომ პოლიტიკოსს კონტაქტუტი დერმატიტი აქვს. მისივე თქმით, ინტენსიური მკურნალობის შემდეგ ნავალნს მდგომარეობა გაუმჯობესდა, თუმცა საპატიმროში მისი დაბრუნების წინააღმდეგი იყო. ვასილიევამ აღნიშნა, რომ შეშუპება გამოწვეული იყო "ტოქსიკური აგენტით", რომელიც ჯერ კიდევ გამოვლენილი არაა.

"კონსილიუმზე აღვნიშნე, რომ კატეგორიული წინააღმდეგი ვარ ალექსეის გამოწერითა და ისევ იმ ადგილას მოთავსებით, სადაც, სავარაუდოდ, არსებობს ეს უცნობი ქიმიური აგენტი", — განაცხადა მკურნალმა ექიმმა.

ალექსეი ნავალნი 27 ივლისის მოსკოვში არასანქცირებულ მიტინგამდე სამი დღით ადრე დააკავეს და ადმინისტრაციული პატიმრობა მიუსაჯეს. ის ამ თვეში უკვე მეორედ დააკავეს. პირველ ჯერზე საპატიმრო დაწესებულებაში მან ათი დღე გაატარა.

28 ივლისს ცნობილი გახდა, რომ ნავალნი "მწვავე ალერგიული ფონის" გამო საავადმყოფოში გადაიყვანეს. როგორც თერაპევტული განყოფილების ექიმმა, ელდარ კაზახმედოვმა განაცხადა, ნავალნი მოსკოვის მთავარ იმუნოლოგ-ალერგოლოგმა დაათვალიერა. ექიმის თქმით, მას სახის არეში კონტაქტური დერმატიტი და თვალების გარშემო შეშუპება აღენიშნებოდა. კაზახმედოვის განმარტებით, ოპოზიციონერის მდგომარეობა დამაკმაყოფილებელია და, სავარაუდოდ, ორშაბათს გამოწერენ.

ნავალნის პირადი ექიმი, ოფთალმოლოგი ანასტასია ვასილიევა ოფიციალურ დიაგნოზს არ იზიარებს. მან და კიდევ ერთმა მკურნალმა ექიმმა პაციენტი საავადმყოფოში მოინახულეს, თუმცა სრულყოფილად მისი დათვალიერება გაძლიერებული დაცვის გამო ვერ მოახერხეს.

ვასილიევამ ფეისბუქზე დაწერა, რომ ნავალნი ღია კარიდან შეათვალიერეს. მისი თქმით, ოპოზიციონერს აღენიშნება ზედა და ქვედა ქუთუთოს შეშუპება და მძიმე ჰიპერტემია, ჩირქოვანი გამონადენი მარჯვენა თვალიდან, ქავილი, გამონაყარი კისრის, ზურგის, მკერდისა და ხელის არეში. ვასილიევას თქმით, ნავალნის ალერგია არ აწუხებს, ის იმავე საკვებს მიირთმევდა, რასაც სხვა პატიმრები და ახალ პარფიუმერიასთან ან ჰიგიენურ საშუალებასთან შეხება არ ჰქონია. აქედან გამომდინარე, მკურნალი ექიმი ამბობს, რომ ოპოზიციონერის ჯანმრთელობის მდგომარეობის გაუარესება, სავარაუდოდ უცნობი ქიმიური ნივთიერების ზემოქმედებას უკავშირდება. ექიმმა ტვ დოჟდს უთხრა, რომ ექსპერტიზისთვის ნავალნის მაისური და თმები აიღო.

ნავალნის გადაყვანის შემდეგ მისმა მხარდამჭერებმა საავადმყოფოსთან შეკრება დაიწყეს. შეკრება დიდხანს არ გაგრძელდა, რადგან ადგილზე პოლიცია მივიდა და მხარდამჭერების დაშლა დაიწყო, ზოგიერთი მათგანი დააკავეს.