მოსკოვში ტრუბნაიას მოედანზე გადასული საპროტესტო აქცია პოლიციამ თითქმის დაშალა. ტელეკომპანია დოჟდის ინფორმაციით, სამართალდამცავებმა მოედანი ალყაში მოაქციეს, ხალხი ერთ გასასვლელთან ჩაკეტეს და ყველას აპატიმრებდნენ.

ემბეექს მედია წერს, რომ შედეგად კიდევ 360 ადამიანი დააკავეს. რუსეთის შინაგან საქმეთა სამინისტროს ინფორმაციით, დაკავებულთა საერთო რაოდენობა 1 074-ს აღწევს.

BBC-ის რუსული ბიუროს ინფორმაციით, პროტესტი არ წყდება და აქციის მონაწილეებმა ფერად ბულვარში გადაინაცვლეს. გარდა ამისა, გამოცემა წერს, რომ დააკავეს ოპოზიციის ლიდერები და აქტივისტები. ზოგიერთი მათგანი დღის განმალობაში უკვე მესამედ.

აქციის მონაწილეებს უნდათ მოსკოვის სათათბიროს არჩევნებში დამოუკიდებელი და ოპოზიციონერი კანდიდატების დაშვება.

სამართალდამცავები რუსეთში აქციას ბოლო რამდენიმე საათია შლიან. ისინი აქციის მონაწილეებს ფიზიკურადაც უსწორდებიან. ხელისუფლება განმარტავს, რომ აქცია არასანქცირებულია.