მოსკოვში საპროტესტო აქციამ ახალ ადგილზე, ტრუბნაიას მოედანზე გადაინაცვლა, სადაც ათასობით ადამიანია შეკრებილი. BBC-ის რუსული ბიურო წერს, რომ პროტესტის მონაწილეებმა ჰიმნი იმღერეს, პოლიციამ კი ამ დროს მათი დაპატიმრება დაიწყო.

ვრცელდება ვიდეომასალა, რომელშიც ჩანს, რომ პოლიციას აქციის მონაწილეები მაშინ გაყავს, როდესაც ხალხი ეროვნულ ჰიმნს მღერის.

ტელეკომპანია დოჟდის ინფორმაციით, უკვე ტრუბნაიას მოედანზე 60 ადამიანი დააკავეს. საერთო ჯამში კი აქციაზე 700 ადამიანია დაკავებული.

გარდა ამისა, დოჟდმა გაავრცელა ვიდეო, სადაც ჩანს, რომ აქციის მონაწილეები სპეცრაზმს გაურბიან. ამ დროს კი ქუჩის მუსიკოსი რუსი მომღერლის, ვიქტორ ცოის სიმღერა "ცვლილებას" მღერის.

აქციის მონაწილეები ითხოვენ დაუშვან მოსკოვის სათათბიროს არჩევნებში დამოუკიდებელი და ოპოზიციონერი კანდიდატები. ხელისუფლება განმარტავს, რომ აქცია არასანქცირებულია.