ბურჭულაძის მოძრაობის მცხეთა-მთიანეთის ორგანიზაციის ყოფილი ხელმძღვანელი, გიორგი ლაფანაშვილი ამბობს, რომ 2015 წლის დეკემბრიდან 2016 წლის მაისის ჩათვლით პაატა ბურჭულაძეს დაახლოებით 555 ათას ლარზე მეტი ხელფასის სახით აქვს აღებული მაშინ, როდესაც მის პარტიაში ფინანსური კრიზისია:

"მათ შორის აპრილის თვეში მიღებული აქვს 187 ათასი ლარი ხელფასის სახით. მე ვსვამ კითხვას, თუ ვთქვათ, თუ პარტია განიცდის ფინანსურ პრობლემებს, შემდეგ ფონდ ჰქონდა ფინანსური პრობლემები და ყველაფერი გამჭვირვალეა, მაშინ როგორ შეიძლება, რომ პარტიის და ფონდის ხელმძღვანელობამ თავის თავს უფლება მისცეს, ასეთი სოლიდური თანხები გამოიწეროს ხელფასად".

ბურჭულაძის პარტიაში განმარტავენ, რომ მოძრაობის ლიდერი თანხებს მხოლოდ მაშინ იღებდა, როდესაც არსებობდა ფონდი. ისინი ამბობენ, რომ მას შემდეგ, რაც ფონდი პარტიად იქცა, ბურჭულაძეს თანხა აღარ აუღია.

პაატა ბურჭულაძე ბრალდებებს ასე ეხმაურება:

"ეს არის ადამიანი, რომელმაც ცოტა ხნის წინ მიატოვა ქართული ოცნება და გადმოვიდა ჩვენთან. ჩვენ ის მივიღეთ, მაჟორიტარადაც გვინდოდა, მაგრამ შემდეგ მივხვდით, ვისთან გვქონდა საქმე და იმიტომ ვეღარ არის ჩვენი მაჟორიტარი. რაც შეეხება იმ თანხას, რომელსაც თქვენ ბრძანებთ.გეტყვით, რომ 1 თეთრიც არ მაქვს აღებული. ეს აუდიტის სამსახურმა იცის, დევს, შეგიძლიათ შეხვიდეთ და ნახოთ".

"პარტია დაარსდა ივნისში და მისი დაარსების შემდეგ ბატონ პაატას არცერთი თეთრი არ მიუღია პარტიისგან", - ასე ეხმაურება პაატა ბურჭულაძის მიმართ გაჟღერებულ ბრალდებებს პარტიის ერთ-ერთი ლიდერი, დავით ჯანდიერი.