უკრაინის უმაღლეს რადაში პირველად შევა ფერადკანიანი დეპუტატი. მოქმედმა სპორტსმენმა, ჟან ბელენიუკმა პრეზიდენტ ვოლოდიმირ ზელენსკის პარტიიდან, ხალხის მსახურიდან იყარა კენჭი.

ჟან ბელენიუკი 28 წლისაა და ის კიევში დაიბადა. მისი დედა უკრაინელია, ხოლო მამა წარმოშობით რუანდიდაა, რომელიც მშობლიურ ქვეყანაში სამოქალაქო ომის დროს 1994 წელს დაიღუპა. პოლიტიკური კარიერის დაწყების წინ ბელენიუკი ბერძნულ-რომაული ჭიდაობით იყო დაკავებული. როგორც რადიო თავისუფლების რუსული ბიურო წერს, ბელენიუკმა განაცხადა, რომ არჩევნების შემდეგ არ აპირებს სპორტული კარიერის დატოვებას და 2020 წლის ტოკიოს ოლიმპიადაში მონაწილეობა სურს. 2016 წელს რიოს ოლიმპიადაზე მან უკრაინის სახელით იასპარეზა და ვერცხლის მედალი მოიპოვა.

ფოტო: Reuters

21 ივლისს უკრაინაში ვადამდელი საპარლამენტო არჩევნები ჩატარდა. უკრაინის ცენტრალურ საარჩევნო კომისიას უკვე ხმების 90 პროცენტზე მეტი აქვს დამუშავებული. წინასწარი შედეგებით, 43,12 პროცენტით ვოლოდიმირ ზელენსკის პარტია ხალხის მსახური ლიდერობს. მას 13,03 პროცენტით ოპოზიციური პლატფორმა მოჰყვება. ყოფილი პრემიერ-მინისტრისა და საპრეზიდენტო კანდიდატის, იულია ტიმოშენკოს პარტია ბატკივშინამ ხმების 8,19 პროცენტი მოიპოვა. ხმების 8,14 პროცენტით მეოთხე ადგილას გადის ყოფილი პრეზიდენტის, პეტრო პოროშენკოს პარტია ევროპული სოლიდარობა.

ვამადელ არჩევნებში საქართველოს ყოფილი პრეზიდენტის, მიხეილ სააკაშვილის პარტიამაც მიიღო მონაწილეობა. ცესკოს წინასწარი მონაწილეობით, სააკაშვილის პარტიამ 0,46 პროცენტი მოიპოვა და ბარიერი ვერ გადალახა.