საქართველოს იუსტიციის მინისტრის, თეა წულუკიანის თქმით, რუსთავი 2-ის წილების გადაფორმების შეჩერება გაუქმებულია და არ საჩივრდება. ამის შესახებ მან იუსტიციის სამინისტროს რუსთავი 2-ის საქმესთან დაკავშირებით გამართულ ბრიფინგზე განაცხადა.

მინისტრის თქმით, თავად ქიბარ ხალვაშის გადასაწყვეტია, როდის გადაიფორმებს ტელეკომპანიის წილებს, რომელიც საქართველოს სამივე ინსტანციის სასამართლომ მიაკუთვნა. თუმცა მას ამის უფლება გადაწყვეტილების გამოქვეყნებისთანავე მიეცა.

სტრასბურგის სასამართლომ არ დაადგინა რუსთავი 2-ის მიმართ არც ერთი მუხლის დარღვევა.

რუსთავი 2-ის საქმეზე სტრასბურგის სასამართლოს გადაწყვეტილება

დღეს, 18 ივნისს რუსთავი 2-ის საქმეზე სტრასბურგის სასამართლოს გადაწყვეტილება გახდა ცნობილი. სტრასბურგის სასამართლომ მიიჩნია, რომ ადამიანის უფლებათა ევროპული კონვენციის არცერთი მუხლი არ დარღვეულა. ამავე გადაწყვეტილებით, სტრასბურგის სასამართლომ აღარ დატოვა ძალაში აღსრულების დროებითი შეჩერების მექანიზმი. ამ მექანიზმის ამოქმედების გამო 2017 წელს არხი ქიბარ ხალვაშმა ვერ გადაიფორმა.