ქართული ოცნების წევრი გიორგი კახიანი მიიჩნევს, რომ შინაგან საქმეთა მინისტრის გადადგომის მოთხოვნა არასწორია მაშინ, როცა პოლიცია მოქმედებდა ლეგიტიმურად. მისი აზრით, გიორგი გახარიას გადადგომა საზოგადოებისა და პოლიციისთვის ცუდი გზავნილი იქნებოდა. ამის შესახებ მან TV პირველის ეთერში ისაუბრა.

"ასეთ შემთხვევაში, როდესაც ყველა ამბობს, რომ პოლიციაზე ძალადობას ჰქონდა ადგილი, შესაბამისად პოლიციის მოქმედება ამ ნაწილში იყო ლეგიტიმური... მინისტრი რომ გადამდგარიყო, ეს იქნებოდა, რა თქმა უნდა, ძალიან ცუდი მესიჯი, ცუდი გზავნილი, გნებავთ საზოგადოებისადმი, გნებავთ პოლიციის მიმართ", — თქვა გიორგი კახიანმა.

20 ივნისის აქცია სპეცრაზმმა ძალის გადამეტებით დაშალა, რა დროსაც მინიმუმ 160 მოქალაქე, მათ შორის მინიმუმ 30 ჟურნალისტი დაშავდა. აქციის დაშლის დროს სპეცრაზმელების ნასროლი ტყვიის გამო ორმა მოქალაქემ თვალი დაკარგა. ძალის გადამეტების საქმეზე გამოძიება მიმდინარეობს, ამ ეტაპზე დაკავებულია აქციის დაშლაში მონაწილე ორი პირი.