ქართული ოცნების თავმჯდომარემ, ბიძინა ივანიშვილმა განაცხადა, რომ მიესალმება თიბისის დამფუძნებლის, მამუკა ხაზარაძის ინიციატივა საზოგადოებრივი მოძრაობის შექმნის შესახებ. მისი თქმით, ეს პოლიტიკაში ბიზნესმენებისა და ახალგაზრდების რიცხვს გაზრდის.

"კარგია, მივესალმები. რაც უფრო მეტი ბიზნესმენი, რაც უფრო მეტი ახალგაზრდა შემოვა პარტიაში, უფრო სწორად პოლიტიკაში უფრო კარგია და მე ამას მივესალმები, რომ არჩევანი საზოგადოებას ქონდეს, რაც შეიძლება მეტი", — განაცხადა მან.

მამუკა ხაზარაძემ განაცხადა, რომ საზოგადოებრივ მოძრაობას აფუძნებს, სადაც გაერთიანდებიან სხვადასხვა სფეროს წარმომადგენლები.

"ისინი, ვისაც გააერთიანებს საქართველოში თანამედროვე დასავლური ყაიდის სახელმწიფოს მშენებლობის იდეა, რომელსაც ექნება ყველაზე კონკურენტული და ძლიერი ეკონომიკა რეგიონში და სადაც იზეიმებს კანონის უზენაესობა. ერთხელ და სამუდამოდ უნდა შეწყდეს ერთმანეთისადმი სხვადასხვა იარლიყების უსაფუძვლოდ მიწებება და ყველანი სამოქალაქო მშვიდობის იდეის გარშემო უნდა გავერთიანდეთ", — განმარტა მან.

მისი განცხადებით, მოძრაობას პროფესიონალებთან, მეგობრებთან, თანამოაზრეებთან, და სხვადასხვა სფეროს წარმომადგენლებთან ერთად სექტემბერში დააფუძნებს.