ტაო-კლარჯეთში, იშხნის მონასტერში უძველესი იატაკის ფრაგმენტები აღმოაჩინეს. ისტორიკოს ბუბა კუდავას ინფორმაციით, იატაკი 1 032 წლის რეკონსტრუქციის პერიოდისა უნდა იყოს.

ის სრულადაა დაცული დასავლეთ მხარეს. ფრაგმენტები გადარჩენილა გუმბათქვეშა სივრცეშიც – ჩრდილოეთ და სამხრეთ მკლავებში.

ფოტო: ბუბა კუდავა

ბუბა კუდავას განცხადებით, ეს ერთ-ერთი უმნიშვნელოვანესი აღმოჩენაა. სტილის მიხედვით ეს ახალი ნიმუში დიდ მსგავსებას ავლენს ბაგრატის ტაძრის ასევე ახლადგამოვლენილ იატაკის ფრაგმენტებთან. მშენებლობისას გამოყენებულია მასალა კირხსნარი, დაფერილი თეთრად, აგურისფრად და შავად.

"იატაკის ერთი ნაწილი პირველად 3 წლის წინ, სარესტავრაციო სამუშაოების დაწყებისთანავე, ინტერიერში მიწის ფენის მოხსნის შემდეგ გამოჩნდა. მაშინ მხოლოდ მცირე ფრაგმენტების დაფიქსირება მოვასწარით, რომელსაც რესტავრატორებმა მალევე კვლავ მიწა მიაყარეს. სულ ახლახან ცნობილი გახდა, რომ თურქ კოლეგებს იატაკი მთლიანად გაუწმენდიათ." - წერს კუდავა საკუთარ ფეისბუკ გვერდზე.

On.ge-სთან საუბარში მან აღნიშნა, რომ ქართული მხარე აღდგენით სამუშაოებში მონაწილეობას ვერ ღებულობს, რისი მიზეზიც წლების წინ არაერთხელ ჩაშლილი მოლაპარაკებებია. მისი ინფორმაციით, ძველი იატაკის დაცვის მიზნით მომავალში იგეგმება მინის იატაკიანი გარშემოსავლელის გაკეთება. ნაკლული ადგილები კი თურქმა რესტავრატორებმა ბეტონის ხსნარით შეავსეს.

ფოტო: ბუბა კუდავა

ფოტო: ბუბა კუდავა