გორის მაჟორიტარი დეპუტატობის კანდიდატი ირაკლი ოქრუაშვილის, რომელსაც დღეს ცეცხლსასროლი იარაღიდან ესროლეს, მიიჩნევს, რომ ინციდენტი ქართული ოცნების მიერაა პროვოცირებული. გორში დღეს მომხდარი შემთხვევის შედეგად, დაიჭრა ირაკლი ოქრუაშვილის დაცვის წევრი და კოორდინატორი რომელსაც ამ წუთებში გორში ოპერაცია უტარდებათ. ამის შესახებ ირაკლი ოქრუაშვილმა ტელეკომპანია პირველის ეთერში განაცხადა:

"დილიდან ვაწარმოებდით ჩვეულებრივ რეჟიმში საარჩევნო შეხვედრებს. დილიდან ქართული ოცნების აქტივისტები ცდილობდნენ ჩვენი საარჩევნო შეხვედრების ჩაშლას. ეს არ გამოუვიდათ დღის გარკვეულ მონაკვეთამდე. ბოლოს მოიყვანეს კრიმინალური წარსულის მქონე ერთ–ერთი ადამიანი იმისთვის, რომ მას ეს შეხვედრა ჩაეშალა. ეს პიროვნება გახლავთ არაერთგზის მკვლელობაზე, ყაჩაღობაზე და იარაღის უკანონო ტარებაზე არის ნასამართლევი. ეს პიროვნება მოიყვანა ოცნების ერთ–ერთმა კოორდინატორმა ე. ნ.–მ, რომელიც მონაწილეობდა ამ კონფლიქტში. მათ არ გაუვიდათ საარჩევნო შეხვედრის ჩაშლა და ბოლოს გადაწყვიტეს უკვე, რომ ცეცხლსასროლი იარაღი გამოეყენებინათ. რამდენიმე გასროლა განახორციელეს როგორც ჩემ მიმართ, ისე ჩემი დაცვის წევრების მიმართ და ბოლოს დადგა ასეთი საგანგაშო შედეგი – დაიჭრა ჩემი დაცვის წევრი და ჩვენი კოორდინატორი".

ირაკლი ოქრუაშვილი გორში სიტუაციის დაძაბვაში კახა კალაძის ცოლის ძმას, გიორგი არეშიძეს ადანაშაულებს:

"ბოლო რამდენიმე კვირის განმავლობაში საარჩევნო პროცესში შეინიშნებოდა ძველი ბიჭების ჩართვა. ამ ყველაფერს ხელმძღვანელობდა კახა კალაძის ცოლის ძმა, ის უწევდა ორგანიზებას ასეთი ადამიანების ჩართულობას, რომ ე.წ. ქუჩის პალაჟენია გორში დაელაგებინა".

ოქრუაშვილი სამართალდამცავებს მოუწოდებს, დროულად იპოვონ ადამიანი, რომელმაც მისი მიმართულებით ისროლა, წინააღმდეგ შემთხვევაში, "ეს შეიძლება გადაიზარდოს თვითნებურ ანგარიშსწორებაში".

ქართული ოცნების აღმასრულებელი მდივანი, ირაკლი კობახიძე მიიჩნევს, რომ სროლის მოტივი პოლიტიკური არ ყოფილა და ამ ფაქტის "პოლიტიზირება დაუშვებელია":

"მიუხედავად იმისა, რომ პოლიტიკურ აქციაზე მოხდა ეს ფაქტი, მოტივი ამ ქმედების არ იყო პოლიტიკური, არამედ ეს იყო ჩვეულებრივი შელაპარაკება, რომელიც დაიწყო ოქრუაშვილი მხარდამჭერებსა და კონკრეტულ ადამიანს შორის".

შინაგან საქმეთა სამინისტრომ უკვე დაიწყო გამოძიება ჯანმრთელობის განზრახ მძიმედ დაზიანებისა და იარაღის უკანონო შენახვა–შეძენის ტარების ფაქტზე.