შინაგან საქმეთა სამინისტრო აცხადებს, რომ რუსთავი 2-თან მიმდინარე აქციაზე იმყოფებიან სამართალდამცავები, რომლებიც მართლწესრიგს უზრუნველყოფენ.

"პოლიცია უზრუნველყოფს როგორც საზოგადოებრივი წესრიგის დაცვას აქციის მიმდინარეობისას, ისე ტელეკომპანიისა და მისი თითოეული თანამშრომლის უსაფრთხოებას", — აცხადებენ შსს-ში.

რამდენიმე წუთის წინ რუსთავი 2-მა მაუწყებლობა შეწყვიტა. დირექტორმა, ნიკა გვარამიამ მოუწოდა მთავრობას, დაიცვას არხის თანამშრომლების უსაფრთხოება. მისი თქმით, ეთერში არ გავლენ იქამდე, სანამ უსაფრთხოების გარანტიას არ მიიღებენ.

რუსთავი 2-ის შენობასთან წამყვანის გიორგი გაბუნიას ქმედების გასაპროტესტებლად აქცია მიმდინარეობს. აქციის მონაწილეთა ნაწილს თან აქვთ კვერცხები და ცოცხები. ისინი აგრესიულ მოწოდებებს ავრცელებენ და სხვადასხვა მოთხოვნები აქვთ. თავდაპირველად, მათ მოითხოვეს ბოდიში მოეხადა გაბუნიას, შემდეგ არხიდან გვარამიასა და გაბუნიას წასვლა და ტელევიზიის დახურვა. ახლა კი აქციის მონაწილეებმა თქვეს, რომ არა ბოდიში, არამედ დირექტორისა და წამყვანის დასჯა სურთ.

ამ წუთებში რუსთავი 2-თან საპროტესტო აქცია გრძელდება, რომლის წევრებიც გაბუნიასა და გვარამიას დაპატიმრებას მოითხოვენ. ასევე, აგრესიულად მოუწოდებენ არხის თანამშრომლებს დატოვონ ტელევიზია. რუსთავი 2-ის ერთმა ოპერატორმა აქციის მსვლელობისას მუშაობა შეწყვიტა, კამერა ეზოში დატოვა და ტელევიზიდან წავიდა.

რამდენიმე წუთის წინ არხმა მაუწყებლობა შეწყვიტა. დირექტორმა, ნიკა გვარამიამ მოუწოდა მთავრობას, დაიცვას არხის თანამშრომლების უსაფრთხოება. მისი თქმით, ეთერში არ გავლენ იქამდე, სანამ უსაფრთხოების გარანტიას არ მიიღებენ. შსს-მ განაცხადა, რომ იცავენ წესრიგს აქციაზე და არხის თანამშრომლების უსაფრთხოებას.

პუტინის გინება, რ2-ის პოზიცია და გამოხმაურებები

რუსთავი 2-ის პირდაპირ ეთერში წამყვანმა გიორგი გაბუნიამ რუსეთის ფედრაციის პრეზიდენტს აგინა. მან არაეთიკურად და შეურაცხმყოფლად მოიხსენია პუტინის გარდაცვლილი მშობლებიც. გაბუნიას ქცევა არხმა კატეგორიულად დაუშვებლად მიიჩნია და გაემინჯა. მთავრობის წარმომადგენლებმა კი ეს ქვეყნის წინააღმდეგ ომად შეაფასეს.

კახა კალაძემ თქვა, რომ ამას მკაცრი რეაგირება უნდა მოყვეს და ქვეყნისთვის საფრთხის შექმნას არ დაუშვებენ. მსგავსი შინაარსი განცხადებები ჰქონდათ პრემიერ-მინისტრსა და პარლამენტის თავმჯდომარესაც. ორივე მათგანმა აღნიშნა, რომ გაბუნიას გინება საფრთხეს ქმნის და ქვეყნის მტრობაა. პრეზიდენტიც იმავე აზრზეა და ფიქრობს, რომ ეს ქცევა ან "ახალი ომის პროვოცირებას ემსახურება", ან "რევანშია დაუსრულებელ გადატრიალებაზე".

რუსთავი 2 ამბობს, რომ გაბუნიას მიმართვას არხის თვითრეგულირების ორგანო განიხილავს, მთავრობის წარმომადგენლების მსავსი შეფასებები კი სარედაქციო პოლიტიკაში ჩარევად მიაჩნიათ.

გაბუნიას მიმართვა უკვე შეაფასა ეთიკის ქარტიამაც. საბჭოს განცხადებით, ეს არაეთიკური განცხადებები აღვივებს ხელისუფლების მისწრაფებებს შეზღუდოს გამოხატვის თავისუფლება.

ამის ფონზე კი რუსთავი 2-თან აქცია მიმდინარეობს, სადაც მოითხოვენ, რომ გაბუნიამ დატოვოს არხიც და ქვეყანაც. ანტიოპოზიციური და პროსახელისუფლებო ფეიჯები, ასევე, ძალადობრივი ჯგუფები და ქართული ოცნების მხარდამჭერები მოსახლეობას მოუწოდებენ, რომ "არ შეარჩიონ გაბუნიას" მომხდარი.