შტადლერის მატარებელში რუსულ ენაზე ინფორმაციას აღარ აცხადებენ. ამის შესახებ On.ge-ს საქართველოს რკინიგზაში დაუდასტურეს. ინფორმაცია თავდაპირველად გამოცემა ბათუმელებმა გაავრცელა.

კომპანიაში ამტკიცებენ, რომ რუსულად, დაახლოებით, ოთხი თვეა აღარ აცხადებენ და ეს 20 ივნისის მოვლენებს არ უკავშირდება. მათივე თქმით, გაუგებარია, საერთოდ რატომ აცხადებდნენ ამ ენაზე, როცა მშობლიურია ქართული და საერთაშორისო — ინგლისური.

კითხვაზე, თავის დროზე ვინ მიიღო გადაწყვეტილება, რომ რუსულ ენაზე გამოეცხადებინათ ინფორმაცია, კომპანიაში ამბობენ, რომ ამის გარკვევა თავადაც სცადეს და ინფორმაცია არ აქვთ. თუმცა, მათივე თქმით, როცა აღმოაჩინეს რომ ქართულთან და ინგლისურთან ერთად რუსულ ენაზეც აჟღერებდნენ, შეცვალეს.

20 ივნისის აქცია

რუსი დეპუტატის, სერგეი გავრილოვის მიერ სკამის დაკავებას საპროტესტო ტალღა მოჰყვა პარლამენტის წინ. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას.

აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი.

შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა. საქმეზე გამოძიება სისხლის სამართლის კოდექსის 225-ე მუხლით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს.