სამტრედიის საკრებულოს სხდომაზე სოფელ მელაურის რწმუნებულმა სოფიკო კიკაჩეიშვილმა პრორუსული განცხადებები გააჟღერა და საქართველოს პარლამენტთან მიმდინარე აქციის მონაწილეები ჰომოფობიური და შეურაცხმყოფელი ტერმინოლოგიით მოიხსენია.

"ყველა ერთუჯრედიანია და უპატრონო დგას რუსთაველის გამზირზე", "ნეტა რუსეთთან აღდგებოდეს კარგი ურთიერთობა", — ამ შინაარსის ფეისბუქსტატუსების გამო ნაციონალური მოძრაობის წარმომადგენელმა მამუკა ბიბილეიშვილმა სოფიკო კიკაჩეიშვილის გადაყენება მოითხოვა.

პირველ ივლისს ფეისბუქში გავრცელებულ ვიდეოში ისმის, რომ ოპოზიცია ამ განცხადებების გამო კიკაჩეიშვილს ქართული ოცნების სახედ მოიხსენიებს, კიკაჩეიშვილი კი პასუხობს:

"რა სახე, რა ხელებს მიშლი, უზრდელი ეს. რას გავდით საერთოდ, თუ გქონდათ ან სოფელი ან ქალაქი. ვაზაგაშვილის, გირგვლიანის სულს, რას პასუხობთ, არაკაცებო თქვენ. მე ჩემს სამსახურებრივ მოვალეობას 10-იანზე ვასრულებ და მაქვს, ჩემი აზრი. ცისფერები, ლეზბიანკები, პიდარასტები ყავენ იქ და ნაციონალები. ვინ არის იქ ნორმალური, სამარცხვინოები ხართ. ვენაცვალე გახარიას. ჩემი შვილი იქ ვერ გაბედავდა გასვლას. რუსეთი კარგი რომაა ის რომ ვთქვი, მაგიტომ ვარ.... თურქეთთან ნაკლები ურთიერთობა გვქონდა? ისტორიას გადახედე..."

On.ge დეტალების გასარკვევად სოფიკო კიკაჩეიშვილს დაუკავშირდა. სოფლის რწმუნებული On.ge-ს ზარმა გააღიზიანა და თქვა: "თქვენნაირებთან კომენტარს არ ვაკეთებს, საქმე მაქვს და ვმუშაობ".

პირველი ივლისის საკრებულოს სხდომას საკრებულოს თავმჯდომარის მოადგილე კობა ძიძიგური უძღვებოდა. ვიდეოში ჩანს, რომ ის ოპოზიციის რეპლიკას "ხელისუფლების სახესთან" ასე პასუხობს: "გავიგეთ, თქვენ ნაციონალური მოძრაობის სახე ხართ".

კითხვაზე, რა რეაგირება მოახდინა საკრებულომ სოფლის რწმუნებულის სოფიკო კიკაჩეიშვილს პრორუსულ და ჰომოფობიურ განცხადებებზე, კობა ძიძიგური პასუხობს, რომ "მას არ ეხება".

"ჩვენ არ გვეხება, როგორც სხდომის წამყვანს და საკრებულოს უშუალოდ, თუ რომელი თანამშრომელი, რა განცხადებას აკეთებს. არ გვაქვს დიქტატორული რეჟიმი. პოლიტიკური განცხადებების უფლება ყველას აქვს. აღელვებულ ნიადაგზე შეიძლება რამე წამოცდეს ადამიანს და ეს არ ნიშნავს, რომ არის პარტიის პოზიცია. არაფერი რეაგირება ჩვენ არ მოგვიხდენია, გაფრთხილებით გავაფრთხილეთ და დანარჩენი მისი გადასაწყვეტია", — უთხრა On.ge-ს კობა ძიძიგურმა.

პირველი შემთხვევა არ არის, როცა სოფიკო კიკაჩეიშვილი ჰომოფობიურ და პრორუსულ განცხადებებს აკეთებს. თავდაპირველად, ქუთაისი პოსტისთვის მიცემულ სატელეფონო ინტერვიუში კიკაჩეიშვილმა თქვა, რომ მას რუსეთი მოსწონს და ევროპა არ უნდა.

"მართლმადიდებლური ქვეყანაა და კარგია, სარწმუნოება ერთი გვაქვს, ყველაფერი კარგი იქ არის... საჭმელი, სასმელი. აბა, ევროპა ჯობია? ევროპა? "პიდარასტების" და "ცისფერების" და "ლეზბოსელების" ქვეყანა? მე მომწონს რუსეთი, მაგათი ტრადიციები. ოკუპანტია, თუ რაც არის, თურქეთი არანაკლები მტერი იყო ჩვენთვის, მაგრამ ხო გვაქვს ახლა ურთიერთობები? რუსეთ-გერმანია როგორ იყო, მაგრამ ხო აქვთ ახლა დალაგებული ურთიერთობები," — ამბობს კიკაჩეიშვილი.

#სირცხვილია

საქართველოში ანტისაოკუპაციო აქციები #სირცხვილია მე-13 დღეა მიმდინარეობს. სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

პარლამენტის თავმჯდომარის გადადგომას წინ უსწრებდა 20 ივნისის ღამე, როცა შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. მათი პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა. დაშლის დროს დაშავდა ასობით ადამიანი, მათგან ორმა თვალი დაკარგა, ერთ-ერთი კი ამ დრომდე კომატოზურ მდგომარეობაში, სამედიცინო დაწესებულებაში რჩება. შედეგად, აქციები ამ დრომდე გრძელდება შინაგან საქმეთა მიინისტრის გიორგი გახარიას გადადგომის მოთხოვნით.