საქართველოს იუსტიციის სამინისტროს ინფორმაციით, 18 ივლისს რუსთავი 2-ის საქმეზე სტრასბურგის სასამართლოს გადაწყვეტილება გამოქვეყნდება. ამის შესახებ ინფორმაცია იუსტიციის სამინისტრომ გაავრცელა.

რუსთავი 2-ის საქმე

საქართველოს უზენაესი სასამართლოს დიდი პალატის 2017 წლის 2 მარტის გადაწყვეტილებით, ტელეკომპანია რუსთავი 2 მისი ყოფილი მფლობელის, ქიბარ ხალვაშისა და მისი კომპანიის, შპს პანორამას მიაკუთვნა.

ხალვაშმა სასამართლო დავა 2015 წლის აგვისტოში დაიწყო. ტელეკომპანიის ირგვლივ მიმდინარე საქმეები საქართველოში არსებულმა ყველა ინსტანციის სასამართლომ განიხილა, თუმცა, გადაწყვეტილება ყველა შემთხვევაში უცვლელი დარჩა.

რამდენიმე საათში რუსთავი 2-მა ადამიანის უფლებათა ევროპულ სასამართლოს მიმართა. სასამართლომ კი გადაწყვეტილების მიღებამდე მფლობელების შეცვლა შეზღუდა.

რუსთავი 2-ს მიაჩნია, რომ საქართველოში საქმის განხილვის დროს დაირღვა სამართლიანი სასამართლოს უფლება, შეიზღუდა გამოხატვის თავისუფლება და საკუთრების უფლება. სტრასბურგის სასამართლოს შეუძლია თქვას მხოლოდ ის, დაირღვა თუ არა ამ ჩამონათვალიდან რომელიმე უფლება, მის კომპეტენციაში არ შედის იმის დადგენა, თუ ვის ეკუთვნის ტელევიზია რეალურად.