ღვინის კომპანია კახური ტრადიციული მეღვინეობის ქარხანაზე რუსეთის დროშა აღარ ფრიალებს. ქარხანაზე აღმართული დროშის ფოტო გამოცემა ლაბაორატორიამ გაავრცელა.

კომპანიაში On.ge-ს თავდაპირველად უთხრეს, რომ ამ საკითხზე არ ისაუბრებდნენ. თუმცა, მოგვიანებით ელექტრონული ფოსტის საშუალებით კომუნიკაციას დათანხმდნენ.

კომპანიაში აღნიშნავენ, რომ რუსეთის სახელმწიფო პოლიტიკას გმობენ. მათივე თქმით, "ქვეყანაში ბოლო დროს განვითარებული ნეგატიური მოვლენების გათვალისწინებით" ქარხნის ტერიტორიიდან დროშა ჩამოხსნეს. კომპანიაში განმარტავენ, რომ წლების განმავლობაში, ღვინის გადამამუშავებელი ქარხნის ტერიტორიაზე აღმართულია ყველა იმ ქვეყნის დროშა, რომელთანაც კომპანიას საქმიანი ურთიერთობები გააჩნია.

"რუსეთის საექსპორტო ბაზრებზე, სხვა უამრავი კომპანიის თუ ბიზნესის მსგავსად, კახური ტრადიციული მეღვინეობაც ინარჩუნებს მხოლოდ საქმიან პოზიციებს", — აღნიშნავენ კომპანიაში.

პირველი შემთხვევა არ არის, როცა სხვადასხვა ობიექტებზე რუსეთის დროშაა გამოფენილი. მსგავსი შემთხვევა 13 ივნისს, ციხისძირში მოხდა. სასტუმრო კასტელო მარეს ეზოში რუსეთის დროშა აღმართეს. მოქალაქეების პროტესტის შემდეგ კი ჩამოხსნეს.