ბიძინა ივანიშვილი გადაცემაში შეხვედრები რეგიონალურ მედიასთან გავრცელებულ ფარულ ჩანაწერს ეხმაურება, რომელშიც სავარაუდოდ ერთიანი ნაციონალური მოძრაობის წევრების საუბარი ისმის სახელმწიფო გადატრიალების გეგმაზე. ივანიშვილი აცხადებს, რომ ჩანაწერის ავთენტურობის დამტკიცება საჭირო არაა, რადგან ნაცმოძრაობა ისედაც "ძალადობით არის ცნობილი":

"ავთენტურობას რაც შეეხება, არაა აქ დიდი კვლევები საჭირო და არ აქვს დიდი მნიშვნელობა, ეს ავთენტურია თუ არა. მათი ღია განცხადებები რომ ნახოთ, ერთ კონტექსტში ჯდება ეს ყველაფერი. აი ცოტა ხნის წინ ნაციონალების გაქცეულმა ლიდერმა განაცხადა, რომ რუსთავი 2-ზე გამოქვეყნდება ეგზიტპოლები და ეს იქნება საბოლოო შედეგი".

ივანიშვილმა ასევე გაიხსენა სანდრა რულოვსის განცხადება მიხეილ სააკაშვილზე, სადაც ენმ-ს ზუგდიდის მაჟორიტარობის კანდიდატი ამბობს, რომ გვირაბის გათხრა რომ დასჭირდეს ოდესიდან სოლოლაკამდე, ექსპრეზიდენტი ამას გააკეთებს და საქართველოში ჩამოვა.

"ენმ-ში 2012 წლიდან ერთმანეთს იმით ამხნევებდნენ, რომ გაზაფხულზე გეგმავდნენ რევოლუციას, არ გამოუვიდოდათ, შემოდგომაზე გადადიოდნენ და ა.შ. ამით ამაგრებდნენ ერთმანეთს.

თან მეეჭვება, პროკურატურამ რომ თქვას, რომ ჩანაწერი ავთენტური არ არის, გამოვლენ და იტყვიან, როგორ, რას ამბობთ, ნამდვილად ვილაპარაკეთო. ამით რეკლამას იკეთებენ.

რითაც იყვნენ ცნობილნი, ქვების სროლით მოვიდნენ, ხომ გახსოვთ. ძალადობით იყვნენ ცნობილნი".

27 სექტემბერს გავრცელდა ფარული აუდიოჩანაწერი, რომელშიც სავარაუდოდ მიხეილ სააკაშვილის და ნაციონალური მოძრაობის წევრების საუბარი ისმის. ისინი სახელმწიფო გადატრიალების გეგმაზე საუბრობენ. ჩანაწერის ავთენტურობა ჯერ დადასტურებული არაა. ენმ ჩანაწერს ფაბრიკაციას უწოდებს.

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.