კომპანია რემაქს კაპიტალი თბილისში 20 ივნისს განვითარებულ მოვლენებს ეხმიანება და რუსულ ოკუპაციას გმობს. კომპანიის გუნდი ამბბოს, რომ რუსეთის მოქალაქეებს არ გაუწევენ საბროკერო მომსახურებას საქართველოში უძრავი ქონების შესაძენად.

ოკუპაციის კიდევ რამდენიმე კომპანიამ გააპროტესტა. თბილისში კაფე ეზომ და ბათუმში კაფე გარდენსმა რუსეთის მოქალაქეებს + 20%-იანი გადასახადი დაუწესა. ხოლო სასტუმრო მეხუთე სეზონმა განაცხადა, რომ, "ოკუპაციის გადასახადს" აიღებენ ყველა რუსეთის მოქალაქისგან, რომელიც არ გმობს ვლადიმერ პუტინის იმპერიალისტურ რეჟიმს.

"ოკუპირებული სკამი"

მართლმადიდებლობის საპარლამენტთაშორისო ასამბლეის ფარგლებში, რომელიც 19-22 ივნისს უნდა გამართულიყო, საქართველოში 25 ქვეყნის დელეგაცია ჩამოვიდა, მათ შორის რუსეთის დუმის სამი დეპუტატი. ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. ხელისუფლების წარმომადგენლები ამბობდნენ, რომ სხდომა ასამბლეის გენერალურ მდივანს, ბერძენ დეპუტატს უნდა წაეყვანა და ეს პროტოკოლის მიხედვით იყო განსაზღვრული. მათ ისიც ახსენეს, რომ გავრილოვის მხრიდან ეს იყო მიზანმიმართული პროვოკაცია.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო ცრემლსადენი გაზით, რეზინის ტყვიებითა და წყლის ჭავლით.