თბილისის მერის კახა კალაძის განცხადებით, 23 ივნისს თბილისში მარათონი გაიმართება. სწორედ, 23 ივნისს აქვს დაგეგმილი თბილისი პრაიდს ღირსების მარშის ჩატარება.

მერი ინფორმაციით, გარბენში მონაწილეობის მსურველების რეგისტრაცია 23 ივნისს, დილის 9 საათზე დაიწყება.

"მარათონი სტარტს აიღებს რესპუბლიკის მოედნიდან და დამთავრდება ორბელიანის მოედანზე. მინდა მოვუწოდო ყველას, ვისაც სურვილი აქვს მობრძანდით და ჩვენთან ერთად მხარი დაუჭირეთ ჯანსაღი ცხოვრების წესის დანერგვას", — აღნიშნა კახა კალაძემ.

თბილისის მერის თქმით, მარათონის დასრულების შემდეგ საღამოს კონცერტი გაიმართება.

თბილისში 18-დან 23 ივნისის ჩათვლით LGBTQI პრაიდი გაიმართება. კვირეულის ფარგლებში სხვადასხვა სოციალური, კულტურული და პოლიტიკური ღონისძიებია დაგეგმილი. მათ შორისაა საერთაშორისო კონფერენცია, სოციალური სპექტაკლი და "ღირსების მარში". თბილისი პრაიდის ორგანიზატორების ინფორმაციით, ღირსების მარში 23 ივნისს გაიმართება, თუმცა ამ ეტაპისთვის ზუსტი ადგილმდებარეობა გასაჯაროვებული არ არის.