"მე რომ შინაგან საქმეთა მინისტრი ვიყო, დღეს იქვე ტრიბუნაზე დავაკავებდი ვასაძეს", — ასე შეაფასა ყოფილმა თავდაცვის მინისტრმა, თინა ხიდაშელმა ბიზნესმენ ლევან ვასაძის ძალადობრივი მოწოდებები. ამის შესახებ ხიდაშელმა ფეისბუქგვერდზე დაწერა.

ლევან ვასაძე თავის ორგანიზებულ "ნამდვილი კაცების" აქციაზე ძალადობრივ მოწოდებებს ავრცელებდა და მხარდამჭერებს დაუმორჩილებლობისკენ მოუწოდებდა. ვასაძე ემუქრებოდა ლგბტ პირებს, სამართალდამცავებს, დიპლომატებს, უცხოელ სტუმრებსა და არასამთავრობო ორგანიზაციებს.

ის ამბობდა, რომ პოლიციას თუ არ "ეყოფა ჭკუა" და კორდონს ჩადგამს, მაშინ მხარდამჭერებთან ერთად მას კომბლებით შეიარაღებული გაარღვევს. ასევე, ვასაძემ დააანონსა "სახალხო ლეგიონის" შექმნა, რომელიც ლგბტ პირებს ხელების ქამრით შეკვრითა და ყურის აწევით ემუქრება.

ამ საკითხებთან დაკავშირებით შინაგან საქმეთა სამინისტროს ჯერ გამოძიება არ დაუწყია. როგორც On.ge-ს განუცხადეს, თუ უწყებას განცხადება ექნება, თავად გაავრცელებენ.