პარლამენტის ვიცე-სპიკერის, თამარ ჩუგოშვილის განცხადებით, საპატრიარქოს მხრიდან რა მოწოდებაც არ უნდა გაკეთდეს, კონსტიტუციური მოთხოვნები სახელმწიფოსთვის ამოსავალია. ასე გამოეხმაურა ჩუგოშვილი ხელისუფლებისადმი საპატრიარქოს მოწოდებას, არ დაუშვას თბილისი პრაიდი.

"საპატრიარქოს თავისი პოზიცია დაფიქსირებული აქვს, მათ განცხადებაც გააკეთეს და მათი მოსაზრება გასაგებია, თუ რას ფიქრობენ საპატრიარქოს წარმომადგენლები. თუმცა, რა მოწოდებაც არ უნდა გაკეთდეს, კონსტიტუცია არის კონსტიტუცია", — საზოგადოებრივი მაუწყებლის ინფორმაციით, თქვა ჩუგოშვილმა.

14 ივნისს მართლმადიდებელი ეკლესიის საპატრიარქომ განცხადება გაავრცელა და ხელისუფლებას მოუწოდება, თბილისი პრაიდი არ დაუშვას. განცხადებაში საპატრიარქო მოუწოდებს საელჩოებს, საერთაშორისო ორგანიზაციებს, სახალხო დამცველს და სხვა ინსტიტუციებს, რათა "გამოიჩინონ უფრო ფრთხილი დამოკიდებულება" და არ წაახალისონ მსგავსი აქტივობები.