რუსთავი 2-ის გენერალური დირექტორის, ნიკა გვარამიას განცხადებით, რუსთავი 2 ემიჯნება სახელმწიფო გადატრიალებას და მოუწოდეს პოლიტიკურ პარტიებს რომ ისინიც გაემიჯნონ:

"სახელმწიფო გადატრიალება იყო ის, რაც მოხდა 1991 წელს. მზარავს ამ სიტყვების გაგონებაზე და პირობას ვდებ, იქ სადაც მე ვიქნები, არ იქნება სახელმწიფო გადატრიალების ხელშეწყობა არასდროს, არცერთ ვითარებაში, არცერთი მიზეზით. რუსთავი 2 მკაფიოდ ემიჯნება სახელმწიფო გადატრიალებას და მოუწოდებს ყველა პოლიტიკურ აქტორს რომ გაემიჯნონ ცალსახად სახელმწიფო გადატრიალების ხსენებასაც კი".

სახელმწიფო უსაფრთხოების სამსახურის ცნობით, მედიით გავრცელებულ ფარულ ჩანაწერებთან დაკავშირებით, სახელმწიფო უსაფრთხოების სამსახურის კონტრდაზვერვის დეპარტამენტში დაიწყო გამოძიება საქართველოს სისხლის სამართლის კოდექსის 315-ე მუხლის 1-ლი ნაწილით, რაც გულისხმობს შეთქმულებას სახელმწიფო ხელისუფლების დასამხობად ან ხელში ჩასაგდებად.

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული. ჩანაწერის ავთენტურობა ჯერ დადგენილი არ არის.