ციხისძირში, სასტუმრო კასტელო მარეს ეზოში რუსეთის დროშა აღმართეს. ამის შესახებ ინფორმაცია თავდაპირველად TV 25-მა გაავრცელა.

სასტუმროს დირექტორის მოადგილემ, ზანდა მესხიძემ On.ge-სთან განმარტა, რომ სასტუმროში კონფერენცია იმართება, რომელსაც რუსეთის დიდი ჯგუფი ესწრება და დროშაც მათ საპატივცემულოდ აღიმართა.

"ზოგადად, სასტუმროს პოლიტიკიდან გამომდინარე, არ აქვს მნიშვნელობა ეს იქნება რუსეთი, აზერბაიჯანი, სომხეთი პოლონეთი, რომელი ეროვნებაც იქნება 45 პროცენტზე მეტი, მათი დროშა იკიდება მათ საპატივცემულოდ, როგორც სტუმარ-მასპინძლობის მიხედვით. შესაბამისად, იყო ჩამოკიდებული", — ამბობს ის.

მისივე თქმით, კონფერენცია დასრულდა და დროშა ჩამოიხსნება, მის ნაცვლად კი დაიკიდება იმ ქვეყნის დროშა, საიდანაც მეტი ვიზიტორი ეყოლება სასტუმროს.

კითხვაზე, ოკუპაციის ფონზე რამდენად სწორია რუსეთის დროშის აღმართვა, სასტუმროს წარმომადგენელი აცხადებს, რომ ამ ყველაფერს პოლიტიკურად ვერ განიხილავს იმიტომ, რომ თავად სასტუმროს რუსი სტუმრები აკრიტიკებენ თავიანთ პოლიტიკას და არ მოსწონთ ის, რასაც რუსეთი აკეთებს.

"ეს არის ხალხის მიმართ პატივისცემა და არა როგორც ოკუპანტი რუსეთის მიმართ, რა თქმა უნდა. ჩვენ ვიზიარებთ ამ ყველაფერს, ვამბობთ რომ რუსეთი ოკუპანტია და არ ვიცავთ მათ ინტერესებს, არც ერთ შემთხვევაში... თუ ჩვენ ვფიქრობთ, რომ რუსეთს, როგორც ხალხს, არ უნდა ვცეთ პატივი, მაშინ საზღვარიც დავუკეტოთ და არ შემოვუშვათ იმიტომ, რომ ასე ვერ მოხდება დიფერენციაცია", — ამბობს მესხიძე.

მისივე განცხადებით, რუსეთის დროშას აღარ ჩამოკიდებენ, რადგან სასტუმრო ხალხის წინააღმდეგ წასვლას არ აპირებს. ის აქვე აზუსტებს, რომ მათ არ ეგონათ, დროშის აღმართავს ასეთი პროტესტი თუ მოყვებოდა.

"ჩვენ ჯიუტი ბავშვის როლში არ ვიქნებით და ჩამოვხსნით დროშას და შეგვიძლია, რომ აღარ ჩამოვკიდოთ იმიტომ, რომ ეს არის ვთქვათ, ქვეყნისა და ხალხის პროტესტი, ასეთ შემთხვევაში ხალხის წინააღმდეგ სასტუმრო არ წავა. უბრალოდ, არ გვეგონა თუ ამ ყველაფერს ასეთი რთული გამოხმაურება მოყვებოდა, თუნდაც იმიტომ, რომ ეს არ არის 26 მაისი, ეს არ არის ქვეყნის საერთო ხმა, ეს არის ერთი კონკრეტული სასტუმრო, სადაც სტუმარს სცემენ პატივს", — აღნიშნავენ სასტუმროში.