საქართველოს რეგიონული განვითარებისა და ინფრასტრუქტურის მინისტრი მაია ცქიტიშვილი ამბობს, რომ აშშ-ს სახელმწიფო მდივნის მიერ ნათქვამ სიტყვებს: "იმედია, საქართველო დაასრულებს პორტის პროექტს" კითხულობს, როგორც "პროექტის განხორციელებას". ამის შესახებ მინისტრმა გადაცემა პოლიტმეტრში განაცხადა.

მისი თქმით, ანაკლიის პორტში არის მსხვილი ამერიკული ინვესტიცია და ამერიკელ პარტნიორებთან სავაჭრო ურთიერთობის საუბრის ანაკლიის პორტის ხსენება ბუნებრივია.

ჟურნალისტის კითხვაზე, არის თუ არა პომპეოს განცხადებაში ქვეტექსტი, რომ ანაკლიის პორტის დასრულებასთან დაკავშირებით პრობლემებია, მაია ცქიტიშვილი პასუხობს, რომ თავად ასე არ ესმის.

"ამ შემთხვევაში მე სიტყვა "დასრულებას" ვგულისხმობ და ვკითხულობ, როგორც ამ პროექტის განხორციელებას. ამ პროექტის წარმატებული დაწყება, განხორციელება და დასრულება მოხდეს", — თქვა მაია ცქიტიშვილმა.

მისივე თქმით, სტრატეგიული თანამშრომლობის სხვადასხვა ეტაპზე სხვადასხვა საკითხები ამოდის დღის წესრიგში.

პირველად მოხდა აქცენტირება ეკონომიკური თანამშრომლობის. ეს მეტყველებს არა იმაზე, რომ ჩვენ ეკონომიკურ თანამშრომლობაში პრობლემები გვაქვს, არამედ იმაზე, რომ ჩვენ სტრატეგიული თანამშრომლობა უსაფრთხოების სფეროში არის მდგრადი, სტაბილური და სათანადო განვითარების გზაზე დგას", — თქვა მინისტრმა.

11 ივნისს აშშ-ს სახელმწიფო მდივანმა, მაიკ პომპეომ პრემიერ-მინისტრ მამუკა ბახტაძესთან შეხვედრის შემდეგ გამართულ ბრიფინგზე იმედი გამოთქვა, რომ საქართველო ბოლომდე მიიყვანს [ანაკლიის] პორტის პროექტს. მან აღნიშნა, რომ ამ თემაზე პრემიერთან ჰქონდა კომუნიკაცია.

საქართველოს ნატოში გაწევრიანებასთან დაკავშირებით მან აღნიშნა:

"საქართველოს პროგრესი თავდაჯერებულობას მმატებს პრეზიდენტ ტრამპისა და ამერიკის შეერთებული შტატების მთელი მთავრობის სახელით ვისაუბრო, როცა ვამბობ, რომ თქვენ შეერთებული შტატების მხარდაჭერა გექნებათ ნატოში გაწევრიანების გზაზე. ასევე მნიშვნელოვანია, რომ საქართველო უკვე ხარჯავს მთლიანი შიდა პროდუქტის 2 პროცენტს თავდაცვაზე, რაც ნატოს ზღვარია და რის მიღწევისკენაც ჩვენ ნატოს ყველა მოკავშირეს ვუბიძგებთ".

პომპეომ ასევე აღნიშნა, რომ საუბრისას მოუწოდა საქართველოს, გააუმჯობესოს სასამართლო სისტემა, რისი ძალისხმევაც მიმდინარეობს, უზრუნველყოს, მისი დემოკრატია მოიცავდეს თავისუფალ და სამართლიან არჩევნებს. მაიკ პომპეოს თქმით, მან საქართველოს პრემიერთან პარლამენტის პასუხისმგებლობაზეც ისაუბრა, რათა უზრუნველყოფილი იყოს სამთავრობო უწყებების მოქმედებები კანონთან შესაბამისობაში.

თიბისის საქმე და ანაკლიის პორტი

ანაკლიის პორტის სამომავლო განხორციელებასთან დაკავშირებით კითხვები თიბისი ბანკის საქმემ გააჩინა. თიბისი ჰოლდინგ საქართველო ანაკლიის განვითარების კონსორციუმის წევრია. მას შემდეგ, რაც პროკურატურამ ფულის შესაძლო გათეთრებასთან დაკავშირებით გამოძიება დაიწყო, თიბისი ბანკის სამეთვალყურეო საბჭოს წევრებმა, ბადრი ჯაფარიძემ და მამუკა ხაზარაძემ ივარაუდეს, რომ ეს პროცესები ანაკლიის პორტის პროექტის ჩაშლისკენ იყო მიმართული. პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

ეროვნული ბანკის მოთხოვნის შემდეგ კომპანიის საბაზრო კაპიტალიზაცია 7,29 პროცენტით შემცირდა, რეალურ თანხაში ეს მაჩვენებელი 55 მილიონზე მეტი გირვანქა სტერლინგია.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭირვალობაზე.

მოგვიანებით, მაშინდელმა ეკონომიკის მინისტრმა, გიორგი ქობულიამ თქვა, რომ თიბისის დამფუძნებლების, მამუკა ხაზარაძისა და ბადრი ჯაფარიძის ირგვლივ შექმნილი ნეგატიური ფონი, კერძო ინვესტორებს "მინიმალური კაპიტალის" შეგროვებას ურთულებს "ანაკლიის პროექტის დასაძრავად".

ანაკლიის ღრმაწყლოვან პროექტზე მუშაობა ანაკლიის განვითარების კონსორციუმმა და სახელმწიფომ 2016 წელს დაიწყეს. პროექტის მიხედვით, სამუშაოების სრულად დასრულების შემდეგ, ის 3 000 ჰექტარზე მეტ ფართობზე იქნება გაშლილი, რომელსაც 32 ნავმისადგომი ექნება. ანაკლიის პორტის გამტარუნარიანობა, წელიწადში, 100 მლნ ტონა იქნება. პორტი ოკუპირებული ტერიტორიებიდან რამდენიმე ათეული კილომეტრითაა დაშორებული.

ამავე თემაზე: