მიმდინარე წლის იანვარში გარდაცვლილი 4 წლის ნინოს მამინაცვალი, სხვა ბავშვებზე ძალადობის ბრალდებით დააკავეს. ძიება ბავშვების მონათხრობის საფუძველზე დაიწყო. კაცი 20 მაისს დააკავეს, თუმცა მედიისთვის ამის შესახებ ახლა გახდა ცნობილი. როგორც პროკურატურაში On.ge-ს განუცხადეს, კაცს უკვე შეეფარდა წინასწარი პატიმრობა.

სოციალური მომსახურების სააგენტოში განაცხადეს, რომ ნინოს გარდაცვალების საქმის დაწყების დღიდან ბავშვები მინდობით აღზრდაში არიან. მეურვეობისა და მზრუნველობის სამმართველოს უფროსი ეთერ ცხაკაია On.ge-სთან ამბობს, რომ ბავშვებზე ძალადობის ნიშნები ექსპერტიზამ დაადასტურა. მისივე თქმით, ბავშვებთან მუშაობენ ფსიქოლოგი და ნევროლოგი, ამასთანავე ისინი მუდმივი სამედიცინო დაკვირვების ქვეშ არიან.

22 იანვარს თბილისში, სანზონაში არსებულ ერთ-ერთ საცხოვრებელ სახლში ოთხი წლის გოგო გარდაცვლილი იპოვეს. გარდაცვალების ფაქტზე გამოძიება სისხლის სამართლის კოდექსის 116-ე მუხლით დაიწყო, რაც გაუფრთხილებლობით სიცოცხლის მოსპობას გულისხმობს. გარდა ამისა, პოლიციამ დააკავა გარდაცვლილის დედა, რომელსაც კანონით ბავშვთან მიახლოება ეკრძალებოდა. დედა შემაკავებელი ორდერის შეუსრულებლობას ედავებიან. ქალს აღკვეთის ღონისძიებად პატიმრობა შეეფარდა.

მოგვიანებით, დედა ბრალი დაუმძიმეს შვილის ჯანმრთელობის განზრახ მძიმედ დაზიანების მუხლით, რომელმაც ბავშვის სიცოცხლის მოსპობა გამოიწვია. ამის შესახებ განცხადება საქართველოს პროკურატურამ გაავრცელა.

უწყების ცნობით, ქალს ბრალად კიდევ ორი მუხლით გათვალისწინებული ქმედება ედება: ოჯახის ერთი წევრის მიერ ოჯახის სხვა წევრის სისტემატური ცემა და ძალადობა, ჩადენილი წინასწარი შეცნობით არასრულწლოვნის მიმართ და შემაკავებელი ორდერით გათვალისწინებული მოთხოვნებისა და ვალდებულებების შეუსრულებლობა, ჩადენილი ოჯახის წევრის მიმართ.

პროკურატურის განცხადებაში ნათქვამია, რომ 2019 წლის 21 იანვრიდან — 22 იანვრამდე ღამის პერიოდში, ბრალდებულმა არასრულწლოვან შვილს თავის არეში მიაყენა სიცოცხლისთვის სახიფათო მძიმე ხარისხის დაზიანებები, ქალა-ტვინის ბლაგვი ტრავმის სახით. მიყენებულმა დაზიანებებმა გამოიწვია სისხლჩაქცევა და თავის ტვინის მკვეთრი შეშუპება, შედეგად 2019 წლის 22 იანვარის დილის საათებში 4 წლის ნინო გარდაიცვალა.