სახელმწიფო უსაფრთხოების ყოფილი ხელმძღვანელისა და ამჟამინდელი თავდაცვის მინისტრის, ლევან იზორიას თქმით, ჩაიხშობა ყველა მცდელობა, რომელიც სტაბილური სიტუაციის არევისკენ იქნება მიმართული:

"კონკრეტული ორგანოები ფლობენ ინფორმაციას და მუშაობენ იმისათვის, რომ მოხდეს ასეთი საფრთხეების თავიდან აცილება. მხოლოდ ხალხი განსაზღვრავს, თუ ვის ეკუთვნის კონკრეტულ ეტაპზე ხელისუფლება. ამას არც სააკაშვილი და არც სხვა პიროვნება არ განსაზღვრავს. ყველანაირი მცდელობა ამ პროცესების მიღმა თუგინდ მოლოდინების გაჩენისას ამ სტაბილური სიტუაციის არევისკენ, ბუნებრივია იქნება ჩახშობისკენ".

დღეს გავრცელდა ფარული აუდიოჩანაწერი, რომელშიც ისმის მიხეილ სააკაშვილისა და ერთიანი ნაციონალური მოძრაობის ლიდერების საუბარი, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული.