ქართული ოცნების თავმჯდომარე ბიძინა ივანიშვილი ამბობს, რომ ევროპელებს მეორე ტური მოსწონთ. ამის შესახებ მან მთაწმინდის მეოთხე უბანზე განაცხადა, სადაც ხმა მისცა.

"დღეს ბოლო არჩევანსაც ნახავთ, რომ ქართული ოცნების კანდიდატი ისევ დიდი უპირატესობით გაიმარჯვებს. მეორე ტური მთაწმინდაზე მხოლოდ დემოკრატიულობის მაჩვენებელია, ევროპელებს ძალიან მოსწონთ მეორე ტური და ძალიან არ უყვართ, როდესაც დიდი უპირატესობით უგებს ერთი კანდიდატი", — თქვა ივანიშვილმა.

მისივე განცხადებით, მთაწმინდაზე პირველი ტური "საკმაოდ კულტურულად" ჩატარდა, ევროპული არჩევნები იყო და ამაში წვლილი ორივე კანდიდატმა შეიტანა.

მთაწმინდის საარჩევნო ოლქში მეორე ტური ლადო კახაძესა და შალვა შავგულიძეს შორის იმართება. პირველ ტურში ქართული ოცნების კანდიდატმა, ვლადიმერ კახაძემ ხმების 41 პროცენტი (6 036 ხმა) მიიღო, მისმა კონკურენტმა თავისუფალი დემოკრატებისა და ევროპული საქართველოს საერთო კანდიდატმა, შალვა შავგულიძემ — 36,83% (5 422 ხმა).