საქართველოს ახალგაზრდა იურისტთა ასოციაცია სახელმწიფო ინსპექტორის შესარჩევ კომისიას დებულებით განსაზღვრული წესების დარღვევაში ადანაშაულებს. ამის შესახებ საია-ს თავმჯდომარემ, სულხან სალაძემ ბრიფინგზე განაცხადა.

მისი განცხადებით, კომისიის დებულების შესაბამისად მომზადებული სამოტივაციო წერილი მხოლოდ ერთმა კანდიდატმა, ლონდა თოლორაიამ წარმოადგინა, თუმცა გასაუბრების ეტაპზე მოიწვიეს არა ერთი, არამედ სხვა კანდიდატებიც. სალაძე ამბობს, რომ მათი სამოტივაციო წერილები დებულებით განსაზღვრულ წესს არღვევდა.

"ეს აჩენს ეჭვს, რომ კომისია გასაუბრებას ფორმალურად მიუდგა", — ამბობს ის.

სალაძემ საიას ბრალდება ბრიფინგზე პროცედურების განხილვით ახსნა. მისი თქმით, კომისიის დებულება განსაზღვრავდა, კონკურსში მონაწილეობისათვის წარმოსადგენი დოკუმენტების ნუსხას, მათ შორის სამოტივაციო წერილის წარმოდგენის ვალდებულებას.

ამასთან, სალაძის განცხადებით, კომისიის დებულებაში, ნათლად და მკაფიოდ ეწერა, რომ წარმოდგენილ სამოტივაციო წერილში ასახული უნდა ყოფილიყო კანდიდატის ხედვა ადამიანის უფლებათა დაცვის სფეროში არსებული გამოწვევების, გასატარებელი ღონისძიებების, სახელმწიფო ინსპექტორის ინსტიტუტის განვითარებისა და ეფექტიანობის ამაღლების შესახებ.

"ზემოთ აღნიშნული საკითხების სამოტივაციო წერილში ასახვა ისეთივე ვალდებულება იყო, როგორც დებულებით გათვალისწინებული ნებისმიერი სხვა დოკუმენტის წარმოდგენა. შესაბამისად, კომისიას გასაუბრების ეტაპზე მხოლოდ ის კანდიდატი/კანდიდატები უნდა გადაეყვანა, ვინც სრულად აკმაყოფილებდა დებულებით განსაზღვრულ მოთხოვნებს, მათ შორის სამოტივაციო წერილის ნაწილში", — ამბობს სალაძე.

კომისიამ კანდიდატებთან გასაუბრება 2019 წლის 1 ივნისს ჩაატარა. სალაძის თქმით, მან და კიდევ ერთმა კომისიის წევრმა კომისიას არაერთხელ სთხოვა დებულების დაცვა. კომისიის უმრავლესობის გადაწყვეტილებით დებულება მაინც დაირღვა და კომისიამ, ერთის ნაცვლად გასაუბრება 5 პირთან ჩაატარა, საიას თავმჯდომარემ, პროტესტის ნიშნად გასაუბრების პროცესში მონაწილეობა არ მიიღო.

საიას თქმით, სავარაუდოდ, სწორედ ხელახალი კონკურსის ჩატარების თავიდან აცილების მიზნით იყო მოწვეული გასაუბრებაზე დანარჩენი კანდიდატები, საიდანაც საბოლოოდ ორი კანდიდატი წარედგინა პრემიერ-მინისტრს.

საია მოუწოდებს საქართველოს პარლამენტს, მხარი არ დაუჭიროს სახელმწიფო ინსპექტორის შესარჩევი საკონკურსო კომისიის დებულების დარღვევით გამოვლენილ რომელიმე კანდიდატს.

2019 წლის პირველ ივნისს, სახელმწიფო ინსპექტორის შესარჩევმა საკონკურსო კომისიამ, საქართველოს პრემიერ-მინისტრის ინსპექტორობის ორი კანდიდატი: ვალერი ლომუაშვილი და ლონდა თოლორია წარუდგინა.