სახალხო დამცველი შინაგან საქმეთა სამინისტროს მოუწოდებს, თბილისი პრაიდის ორგანიზატორებთან კომუნიკაცია გააგრძელოს. ასე ეხმაურება ომბუდსმენი შსს-ს განცხადებას, სადაც აღნიშნულია, რომ დაგეგმილ ადგილებზე და დაგეგმილი ფორმატით ღონისძიებების ჩატარება, ჩართული პირების უსაფრთხოებასთან დაკავშირებული რისკების გათვალისწინებით, შეუძლებელია.

სახალხო დამცველი აღნიშნავს, რომ კანონმდებლობით, მშვიდობიანი შეკრებისა და მანიფესტაციის ჩატარება კონსტიტუციით გარანტირებული უფლებაა. მისივე განცხადებით, სახელმწიფო ვალდებულია, უზრუნველყოს მშვიდობიანი დემონსტრანტების მიერ ამ უფლების სრულფასოვანი რეალიზება და შესაბამისი რესურსის მობილიზებით ისინი კერძო პირებისგან დაიცვას.

"იმ შემთხვევაში თუ სახეზეა შეკრების თავისუფლების შეზღუდვის კანონმდებლობით განსაზღვრული კონკრეტული საფუძველი, შსს-ს ევალება დაასაბუთოს, რომ შეზღუდვა ემსახურება კონსტიტუციით დაცული სიკეთეების მიღწევას, მისი გამოყენება აუცილებელია დემოკრატიული საზოგადოებისთვის, არის არადისკრიმინაციული და პროპორციულად შემზღუდველი და წარმოადგენს იმგვარ საშუალებას, რომლის გამოყენებით დაცული სიკეთე აღემატება შეზღუდვით მიყენებულ ზიანს", — ნათქვამია განცხადებაში.

ომბუდსმენი მიიჩნევს, რომ შინაგან საქმეთა სამინისტროს მიერ გავრცელებული განცხადება ვერ იქნება მიჩნეული ასეთ დასაბუთებულ გადაწყვეტილებად.

სახალხო დამცველი მოუწოდებს შინაგან საქმეთა სამინისტროს, ღირსების მარშის ჩატარებამდე აწარმოოს სათანადო მოსამზადებელი სამუშაოები და გაატაროს ყველა საჭირო ღონისძიება, რათა უზრუნველყოს მოქალაქეთა მხრიდან მშვიდობიანი შეკრების თავისუფლების სრულფასოვანი რეალიზება. ომბუდსმენის თქმით, იმ შემთხვევაში, თუ უფლების განხორციელება შეიზღუდება კანონმდებლობით გათვალისწინებული საფუძვლით, გადაწყვეტილება სათანადოდ დაასაბუთოს.

სახალხო დამცველი მზადყოფნას გამოთქვამს, თბილისი პრაიდის გუნდსა და შინაგან საქმეთა სამინისტროს შორის მოლაპარაკებებში ჩაერთოს.

ამავე თემაზე: