მე-11 კლასის, 16 წლის მოსწავლე ლაგოდეხში 40 წლის ნათესავს გაუპატიურებაში ადანაშაულებს. ამის შესახებ ინფორმაცია რეგინფომ გაავრცელა. გამოცემა წერს, რომ გოგო გაკვეთილზე შეუძლოდ გახდა. საავადმყოფოში გადაყვანის შემდეგ აღმოჩნდა, რომ გოგო ორსულად იყო და იმავე დღეს ბავშვი გააჩინა.

პოლიცია მომხდარს სისხლის სამართლის კოდექსის 140-ე მუხლით იძიებს. ეს გულისხმობს სრულწლოვნის სექსუალური ხასიათის შეღწევას დამნაშავისთვის წინასწარი შეცნობით თექვსმეტი წლის ასაკს მიუღწევლის სხეულში. დანაშაული ისჯება თავისუფლების აღკვეთით ვადით შვიდიდან ცხრა წლამდე.

40 წლის კაცი ბრალდებას უარყოფს. მისი თქმით, ნათესავ ბავშვთან არავითარი სექსუალური კავშირი არ ჰქონია.

"მშობიარობის შემდეგ გოგო ნათესავებმა სავარაუდო მოძალადეს გაარიდეს და მშობლების სახლიდან თავისთან წაიყვანეს, ჩვილი კი საავადმყოფოში დატოვეს", — წერს რეგინფო.

გამოცემა გოგოს ოჯახის წევრებსა და ნათესავებზე დაყრდნობით წერს, რომ მომხდარის გახმაურების შემდეგ, არასრულწლოვან გოგოს გაუპატიურებაში დადანაშაულებული მამაკაცის 14 წლის ბიჭზე დანიშვნა შესთავაზეს, იმ დათქმით, რომ ბიჭი 16 წლის რომ გახდება, გოგოს ცოლად მერე მოიყვანს.