თბილისის საქალაქო სასამართლომ გაამართლა მოქალაქე გიორგი შანიძე, რომელსაც განსაკუთრებით დიდი ოდენობით ნარკოტიკული საშუალების შეძენა-შენახვა ედებოდა ბრალი. გამოძიება სისხლის სამართლის კოდექსის 260-ე მუხლის მე-6 ნაწილით მიმდინარეობდა, რაც სასჯელის სახით 8-დან 20-წლამდე ან უვადო თავისუფლების აღკვეთას ინთვალისწინებს.

როგორც On.ge-ს შანიძის ადვოკატმა, ლევან აფრასიძემ უთხრა, საქმე 2 წლის განმავლობაში მიმდინარეობდა და მისი დაცვის ქვეშ მყოფს აღკვეთის ღონისძიების სახით გირაო ჰქონდა შეფარდებული. მისივე თქმით, სასამართლომ ბრალდების მხარის მიერ წარმოდგენილი მტკიცებულებები არ მიიღო.

"მთავარმა გამომძიებელმა მის მიერ შედგენილი ვერც ერთი ოქმი ვერ დაადასტურა. ამბობდა, რომ არ ახსოვდა და ბრალდებულსაც ვერ ცნობდა სახეზე. აქედან გამომდინარე, თუ პირმა არ დაადასტურა მის მიერ ჩატარებული საგამოძიებო მოქმედებები, იმ მოქმედებს იურიდიული ძალა, როგორ მტკიცებულებებს, არ აქვთ", — აღნიშნა ადვოკატმა.

სასამართლოში დაიკითხნენ პოლიციელებიც, რომლებიც უშუალოდ ნარკოტიკული საშუალების ამოღებასა და დაკავებაში მონაწილეობდნენ. ლევან აფრასიძის თქმით, მათი ჩვენებები ურთიერთსაწინააღმდეგო იყო.