დღეს რეაბილიტირებული დავით აღმაშენებლის გამზირი გაიხსნა. ცერემონიას საქართველოს პრემიერმინისტრი გიორგი კვირიკაშვილი თბილისის მერთან და ვიცე-მერთან ერთად დაესწრო.

გიორგი კვირიკაშვილმა აღნიშნა, რომ დავით აღმაშენებლის გამზირის განახლება მნიშვნელოვანი იქნება როგორც ადგილობრივი მცხოვრებლებისთვის, ასევე მიმზიდველი გახდება ტურისტებისთვის.

"7 თვის განმავლობაში უზარმაზარი სამუშაო შესრულდა. აღდგენილია ქუჩა, რომელიც პრაქტიკულად მთლიანად კულტურული მემკვიდრეობის ძეგლია. აღდგენილია, არა მხოლოდ გარეგნული იერსახე, არამედ, სადარბაზოები, მათ შორის მხატვრობა, კედლის მოხატულობა, ეზოები, მთლიანად განახლებულია კომუნიკაციები და ეს მხოლოდ პირველი ეტაპია. შემდეგი ეტაპები გულისხმობს მთელი საფეხმავლო მარშრუტების აღდგენას ზედა ქუჩების მიმართულებით;

ასევე, აღდგენილი იქნება მე-19 საუკუნის ბოლოს შექმნილი ბაღების კომპლექსი. ეს იქნება, მნიშვნელოვანი უპირველეს ყოვლისა, ადგილობრივი მცხოვრებლებისთვის - გახუთმაგებულია უძრავი ქონების ფასი; გარდა ამისა, ეს იქნება ერთ-ერთი ყველაზე მიმზიდველი უბანი თბილისში, ყველა ტურისტისთვის" - განაცხადა პრემიერმა.

დავით აღმაშენებლის რეაბილიტირებული გამზირის ნაწილი საფეხმავლო გახდა.

პროექტი 7 თვის განმავლობაში მიმდინარეობდა. რეაბილიტაციისთვის ბიუჯეტიდან 30 მილიონამდე ლარი დაიხარჯა.

ნახეთ ფოტორეპორტაჟი განახლებული აღმაშენებლის გამზირიდან.