მსოფლიოს უმდიდრეს კაცთან განქორწინების პროცესის დასრულებიდან არც ისე დიდი ხნის შემდეგ, ცნობილი გახდა, რომ მაკენზი ბეზოსი ქონების ნახევარს ქველმოქმედებას მოახმარს.

საუბარია თითქმის 37 მილიარდ დოლარზე, რომელმაც განქორწინების შემდეგ მაკენზი ბეზოსი ერთ-ერთ ყველაზე მდიდარ ქალად აქცია. ის შეუერთდა ბილ და მელინდა გეიტსების ინიციატივას, Giving Pledge, რომელიც 2010 წლიდან არსებობს.

"ქველმოქმედებასთან ჩემი დამოკიდებულება გონივრული იქნება. თანხის განაწილება დროსა და ენერგიას მოითხოვს, თუმცა არ გავჩერდები, სანამ სეიფი არ დაცარიელდება", — წერია მის განცხადებაში.

ორგანიზაცია მსოფლიოს უმდიდრეს ადამიანებს ახალისებს, რომ სიცოცხლის განმავლობაში, ან ანდერძის შედგენისას, ქონება საქველმოქმედო მიზნებისთვის გამოიყენონ. მასში 204 წევრია, რომელთა შორის არიან როგორც ინდივიდუალური პირები, ისე ოჯახები.

მაკენზი ბეზოსი და ჯეფ ბეზოსი

ფოტო: Jerod Harris / Getty Images

ბლუმბერგის მილიარდელების ინდექსით მაკენზი ბეზოსი მსოფლიოში 22-ეა. მისი ქონება ამ ეტაპზე 36,6 მილიარდი დოლარია. სიის სათავეში მისი ყოფილი ქმარია, ჯეფ ბეზოსი, ქონებით — $114 მილიარდი.

მაკენზი ბეზოსი წარმატებული მწერალია, რომელსაც ორი წიგნი აქვს დაწერილი, The Testing of Luther Albright და Traps. მისი ლექტორი იყო პულიცერის პრიზის მფლობელი ავტორი ტონი მორისონი. "ის ერთ-ერთი საუკეთესო სტუდენტი იყო ჩემს კლასში, მართლაც ერთ-ერთი საუკეთესო", - ასე იხსენებდა ის მაკენზის.

ბეზოსებმა განქორწინების შესახებ ინფორმაცია იანვარში გაავრცელეს.