ზუგდიდის რაიონულმა სასამართლომ ბიძის განზრახ მკვლელობაში ბრალდებული პირი დამნაშავედ ცნო.

პროკურატურის ცნობით, 2018 წლის 26 ნოემბერს, მსჯავრდებული წარსულში ბიძასთან არსებული კონფლიქტის გამო, შურისძიების მიზნით ზუგდიდის მუნიციპალიტეტის სოფელ ერგეტაში მდებარე საცხოვრებელ სახლთან მივიდა და ბიძას ჩაუსაფრდა.

"როდესაც მსჯავრდებულმა ეზოში მყოფი ბიძა შენიშნა, მიუახლოვდა მას და სანადირო თოფიდან დამიზნებით ორჯერ ესროლა. მიღებული ჭრილობების შედეგად ის ადგილზე გარდაიცვალა", — ნათქვამია უწყების განცხადებაში.

ამავე განცხადებაში ნათქვამია, რომ იმავე დღეს მსჯავრდებული, ბრალის აღიარებით პოლიციის განყოფილებაში მივიდა. მას ბრალდება საქართველოს სისხლის სამართლის კოდექსის 108-ე მუხლით (განზრახ მკვლელობა) წარედგინა და აღკვეთის ღონისძიების სახით პატიმრობა შეეფარდა.

ზუგდიდის რაიონულმა სასამართლომ ის დამნაშავედ ცნო წარდგენილ ბრალდებაში და სასჯელის სახედ და ზომად 10 წლით თავისუფლების აღკვეთა განუსაზღვრა.