კოსმოსური კოლონიებისთვის დიზაინის მომზადება მსოფლიოს მასშტაბით სახელგანთქმულ არქიტექტორთა საყვარელი პროექტი გახდა, მაგრამ მხოლოდ რამდენიმე კონცეფციამ დაიმსახურა ნასას კოსმოსის მკვლევართა მოწონება.

ამ თვის დასაწყისში ნასამ 3D პრინტერით ასაგები საცხოვრისების კონკურსის გამარჯვებული გამოაცხადა. შეჯიბრში მონაწილეებს ისეთი მოდელის შექმნა ევალებოდათ, რომელშიც მარსზე მყოფ ადამიანებს შეეძლებათ ცხოვრება.

2015 წელს დაწყებული შეჯიბრი სამ ფაზად იყო დაყოფილი: დიზაინი, მასალა და მშენებლობა. ფინალურ ეტაპზე მხოლოდ ორი გუნდი გავიდა - Al SpaceFactory და პენსილვანიის სახელმწიფო უნივერსიტეტი. მათ ოთხი დღის განმავლობაში ორიგინალი თავშესაფრის მესამედი ზომის მოდელის აგება დაევალათ.

გამარჯვებულ გუნდს, Al SpaceFactory-ს, $500,000-ის ოდენობის ჯილდო გადაეცა იმ დიზაინისთვის, რომელიც ვერტიკალური კაფსულაა და 30 საათში იბეჭდება. პროტოტიპი, სახელად მარშა, სულ მალე რეალური თავშესაფრის სახით აშენდება დედამიწაზე.

იდეალური პროტოტიპი, თვითმფრინავის მსგავსად, ერთდროულად გამძლე და მსუბუქიც უნდა ყოფილიყო.

მარშას ვერტიკალური კაფსულები დედამიწის ბუნებრივ განათებას იმიტირებენ და, ამასთან, გარეთ არსებული გარემოსთვის თვალის შევლების საშუალებასაც იძლევიან. მასში ასევე ჩაშენებულია ლიუკები, რომლებიც სკაფანდრებისა და მარსის სამკვლევარო როვერის შეპირაპირების პორტის შესანახადაა განკუთვნილი.

კომპანია პროტოტიპს დედამიწის პატარა ბუშტს უწოდებს.

საცხოვრისის ექსტერიერი შედგება ორმაგი გარსისგან, რომელიც კაფსულის შიგნით მუდმივ ტემპერატურას ინარჩუნებს.

კონკურსის ფინალურ ეტაპზე მოდელი ცოცხალი აუდიტორიის წინაშე სულ რაღაც 30 საათში დაიბეჭდა.

კომპანიამ იმ მასალათაგან გამოიმუშავა საკუთარი ფორმულა, რომლებიც წითელ პლანეტაზე ბუნებრივად მოიპოვება. მასალა, იგივე მარსის პოლიმერი, შედგება მარსის შრეებიდან მოპოვებული ბაზალტის ბოჭკოებისგან და იმ მცენარეებისგან დამზადებული ბიოდეგრადირებული პლასტმასისგან, რომლებიც, თეორიულად, მარსზე აყვავებას შეძლებენ. რაც ყველაზე მნიშვნელოვანია, ფორმულას არ სჭირდება წყალი.

პროტოტიპმა წარმატებით გაიარა ნასას ზეწოლის ტესტი, თუმცა პატარ-პატარა ნაწილები მაინც გასცვივდა.

მიუხედავად იმისა, რომ კონკურსის სხვა მონაწილეებმა დაბალგუმბათიანი დიზაინების პროტოტიპები შეიმუშავეს, Al SpaceFactory-ს გუნდის აზრით, ვერტიკალური კაფსულის ფორმის ნაგებობა უფრო კარგად გაუმკლავდება მარსის ატმოსფერულ წნევას. ვერტიკალურად ბეჭვდის სპეციფიკის გამო კი კომპანიის ინდუსტრიული რობოტი, პლანეტის ზედაპირზე გადაადგილების ნაცვლად, ერთ ადგილზე შეიძლება იყოს დამაგრებული. კომპანია პროტოტიპისთვის გამოყენებული მასალების გადამუშავებას გეგმავს, რათა მსგავსი საცხოვრისი დედამიწის ზედაპირზე შექმნას.

"ჩვენ ეს ტექნოლოგიები კოსმოსისთვის განვავითარეთ, მაგრამ ამ დიზაინებმა, შეიძლება, დედამიწაზე დამკვიდრებული შენების სტილიც შეცვალოს", - განაცხადა თავის მოხსენებაში კომპანიის დამფუძნებელმა და აღმასრულებელმა დირექტორმა, დევიდ მალოტმა, - "ბუნებრივი, მცენარეებისგან მოპოვებული ბიოდეგრადირებადი მასალების გამოყენებით სამშენებლო ინდუსტრიის უზარმაზარი მოცულობის ნარჩენების თავიდან მოშორებაა შესაძლებელი".